Eýroodaqtyń 16 elshisi Astana mektepterinde sabaq ótkizdi
ASTANA. QazAqparat - «Eýropa kúni» jyl saıynǵy merekesi aıasynda Eýropalyq odaqtyń ókildigi elshiler men dıplomattarmen birge Astanadaǵy 16 mektepte «Eýropa Kúnderi Saǵaty» atty taqyrypta sabaq ótkizdi, dep habarlaıdy QazAqparat.
Astanadaǵy Eýropalyq odaq ókildiginiń baspasóz qyzmetiniń habaralýynsha, osy sharanyń aıasynda elorda oqýshylary Eýropalyq odaq uıymynyń qyzmeti jaıynda jáne Qazaqstan men Eýropalyq odaq baılanysy týraly málimetterge qanyqty.
Atap aıtqanda, Eýropalyq odaqtyń, Bolgarııa, Chehııa, Germanııa, Estonııa, Gretsııa, Ispanııa, Italııa, Lıtva, Latvııa, Vengrııa, Nıderland, Avstrııa, Polsha, Portýgalııa, Fınlıandııa elshileri aǵylshyn, frantsýz jáne nemis tilderinde Eýropalyq odaqtyń qurylý tarıhy, jetistikteri men áleýeti, ekonomıkasy, saıasaty, mádenıeti men qundylyqtary jaıynda ınteraktıvti sabaq berdi.
Aǵylshyn jáne ózge tilderdi jetik meńgergen Astana oqýshylary Eýropanyń mádenıeti men tarıhy boıynsha suhbattarǵa belsene aralasty, tipti 2015 jyly 21 jeltoqsanda bekitilgen EO men Qazaqstan arasyndaǵy keń aýqymdy seritestik pen yqpaldastyq týraly kelisimdi de keńinen talqyǵa saldy. Sabaq sońynda eń belsendi oqýshylarǵa elshiler EO men oǵan múshe memleketterden kelgen syılyqtar men estelik kádesyılar tabystady.
9 mamyrda Eýroodaq elderinde jyl saıynǵy beıbitshilik pen birlik merekesi - Eýropa kúni atalyp ótedi. Ol, sondaı-aq, EO qurylýdyń bastaýyn salyp bergen «Shýman Deklaratsııasy kúni» retinde de belgili.
Eýropa kúni eýropalyqtar arasyndaǵy birlikti nyǵaıtý úshin qurylǵan eýropalyq sımvoldyń biri bolyp tabylady. Bul mereke Eýroodaq elderinde 1950 jylǵy 9 mamyrdaǵy Shýman deklaratsııasy qabyldanǵan kún qurmetine atalyp ótedi. Oǵan sáıkes Eýropalyq odaqtyń alǵashqy nusqasy Eýropalyq qoǵamdastyq quryldy. Eýropa kúnin 9 mamyrda atap ótýdi 2008 jylǵy qazanda Eýropalyq parlament resmı túrde bekitti.
