«Eýroodaqty «ókpeletip» aldyq» - respýblıkalyq basylymdarǵa sholý
***
Búgingi tańda egemen elimizdiń parasaty bıik, belsendiligi joǵary jáne ıntegratsııalyq bastamalary tartymdy, kóp vektorly sarabdal syrtqy saıasatyn búkil álem moıyndap, qurmettep otyrǵany belgili. Osyndaı tolymdy tabysqa tirnektep, nesheme qıyndyqpen qol jetkizilýi jolynda qazaqstandyq dıplomatııanyń áli de at ústindegi kórnekti ardageri Vıacheslav Ǵızzatov qosqan úles qomaqty. Qazaqstan dıplomattarynyń keıingi tolqyn birneshe býyny bul kisini ózderiniń ustazy sanaıdy, tiri ańyzǵa balaıdy. Olaı bolsa, táýelsizdik jyldarynda eldiń derbes syrtqy saıasatynyń aıaǵynan tik turyp, qalyptasý kezeńderi haqynda Vıacheslav Hamenuly aıtar ulaǵatty áńgimeni egjeı-tegjeıli bilgińiz kelse, «Egemen Qazaqstan» gazetindegi «Elshiniń enshisi - eldestirý» degen taqyrypqa nazar salyńyz.
«Keshe Astanadaǵy «RIXOS» otelinde Qazaqstan Syrtqy ister mınıstriniń tóraǵalyǵymen Ujymdyq qaýipsizdik týraly shart uıymynyń (UQShU) Syrtqy ister mınıstrleri Keńesiniń kezekti otyrysy ótti», - dep jazady «Egemen Qazaqstan» gazeti búgingi sanyndaǵy «Qaýipsizdiktiń ózekti máseleleri qaraldy» degen taqyryptaǵy maqalasynda. Mınıstr keńes barysynda halyqaralyq uıymdardyń 2012 jyly jarııa etýi múmkin málimdemeleriniń taqyryby bekitilip, UQShU-ǵa múshe elder ókilderiniń 2012 jyldyń sońy men 2013 jyldyń basyndaǵy syrtqy saıasat pen qaýipsizdik jáne qorǵanys máselelerine qatysty konsýltatsııalyq josparlary maquldanǵan. «Biz, sonymen qatar UQShU-nyń qurmet belgisin taǵaıyndap, ózge de birqatar sheshimder qabyldadyq. Buǵan qosa, UQShU syrtqy ister mınıstrleriniń kezekti otyrysynyń merzimin naqtyladyq», - depti E.Qazyhanov BAQ ókilderine arnalǵan baspasóz máslıhatynda.
***
Qazaqstandyq birneshe áýe kompanııalar taǵy da Eýroodaqtyń «qara tizimine» ilinip qaldy. Onyń ishinde «Berkut Air» áýe kompanııasy bar. Naq osy kompanııanyń enshisinde Premer-Mınıstr Kárim Másimov jáne basqa da joǵary shendi sheneýnikter ushyp-qonyp júrgen ushaqtar bar eken. Qazaqstannyń áýe kompanııalaryn, áýejaılaryn, áýe mamandary men navıgatsııalyq quraldaryn keshendi teksergen Azamattyq avıatsııa halyqaralyq uıymynyń komıssııasy (IKAO) osyndaı sheshim qabyldaǵan. Atalǵan másele kóterilgen maqala «Aıqyn» gazetinde «Eýroodaqty «ókpeletip» aldyq» degen taqyryppen berilgen.
«Alash aınasy» gazetiniń turaqty «Dat!» aıdarynda QR Bilim jáne ǵylym mınıstrligi Túrki akademııasynyń prezıdenti Shákir Ybyraevpen aradaǵy suhbat «Túrkilik rýhanı birlik ıdeıasy qazaqtyń ulttyq máselesi bolýy kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Túrkilik sana men túrkilik keńistik ıdeologııasy barsha túrki jurty úshin birlik ıdeologııasymen ushtasqany ıgi. Qazaǵym aınalasyndaǵy basqa túrkilerdi baýyrlas, týys halyqtar retinde joǵary kótere sanaıtyn deńgeıge jetýge jáne osyny ulttyq másele deńgeıinde oılanýǵa shaqyrar edim. Bizdiń oıymyzdyń, bolashaq týraly túsinigimizdiń, keleshekke arnaǵan josparymyzdyń bári baýyrlas túrki halyqtarymen birlikke negizdelse eken», - deıdi.
***
HHІ ǵasyrda azyq-túlik qaýipsizdigin qamtamasyz etý máselesi kóptegen elder úshin, onyń ishinde tipti, qaryshtap damyǵan memleketter úshin de strategııalyq basymdyq deńgeıine shyǵyp otyrǵandyǵy ras. Bul tosynnan emes. Sarapshylardyń paıymynsha, 2050 jylǵa qaraı ǵalamshar turǵyndarynyń sany 9,2 mlrd. adamǵa jetedi eken. Al olardyń bárin azyqtandyrý úshin azyq-túlik óndirý kólemin 70 paıyzǵa arttyrý qajet. Aıta keterligi qazirdiń ózinde álemde shamamen 1 mlrd. adamda qarny toıyp, tamaq ishýge múmkinshiligi joq. Osy oraıda «Kazahstanskaıa pravda» gazeti ózin-ózi sapaly azyq-túlikpen qamtamasyz etýdegi elimizdiń qandaı basymdyqtary bar ekendigin QR Parlamenti Májilisiniń depýtaty, Agrarlyq máseleler komıtetiniń múshesi Jeksenbaı Dúısenbaevtan surap bilgen. Suhbat «Selskoe hozıaıstvo trebýet dolgosrochnyh vlojenıı» degen taqyryppen berilgen.
