Eýroodaqtyń jekelegen elderi Ýkraınaǵa AQSh qarýyn satyp alýdan bas tartty
DW basylymynyń málimetinshe, Parıj 14 shildede Vashıngtonda NATO bas hatshysy Mark Rıýtte men AQSh prezıdenti Donald Tramp arasynda talqylanǵan jospardan bas tartqan.
Jospar aıasynda NATO AQSh-tan zamanaýı qarý-jaraq, onyń ishinde áýe shabýylyna qarsy qorǵanys júıelerin satyp alýdy kózdegen bolatyn.
Frantsııanyń bul bastamaǵa qatyspaýyna prezıdent Emmanýel Makronnyń eýropalyq elderge óz qorǵanys ónerkásibin damytýǵa shaqyrýy sebep bolǵan. Ol qarý-jaraqty eýropalyq óndirýshilerden satyp alý qajettigin birneshe márte málimdegen.
Politico basylymy Frantsııanyń bul sheshimine bıýdjet shekteýleri men qorǵanys shyǵyndarynyń ósýi de yqpal etkenin jazdy.
Italııa da osyǵan uqsas ustanym tanytyp otyr. La Stampa málimetinshe, Rım amerıkalyq qarý-jaraqty tikeleı satyp alýdan bas tartqan. Italııa bıligi bul sheshimdi eldegi qarjylyq shekteýlermen jáne eldiń tehnologııalyq basymdyqtarynyń basqa baǵytta ekenimen túsindirip otyr.
Aıta keteıik, buǵan deıin Ýkraınaǵa Italııa men Frantsııa birlesip jasaǵan SAMP/T áýe shabýylyna qarsy júıesin jetkizgen bolatyn.
Italııa Qorǵanys mınıstrligindegi derekkózder bul sheshimdi Ýkraınaǵa qoldaý kórsetýden bas tartý emes, kerisinshe, úles qosýdyń balama joldaryn izdeý retinde qarastyrý kerektigin aıtty.
La Stampa derekterine sáıkes, Italııa qazirgi ýaqytta AQSh qarýyn áýe, temirjol nemese teńiz arqyly logıstıkalyq tasymaldaý máselelerin qarastyryp jatyr jáne bul úderisten «alystap ketpeıtinin» jetkizgen. Alaıda Italııanyń qatysý formasy men kólemi áli naqty aıqyndalmaǵan.
Buǵan deıin AQSh prezıdenti Donald Tramp Ýkraınaǵa NATO arqyly aýqymdy kólemde qarý-jaraq jetkizilip jatqanyn málimdegen bolatyn.