Eýroodaqtyń qorǵanys mınıstrleri Qytaımen qarym-qatynas pen AQSh-pen yntymaqtastyqty talqylady

ASTANA. KAZINFORM — 17 qarashada Brıýsselde Eýropalyq odaqqa múshe elderdiń qorǵanys mınıstrleri bas qosyp, halyqaralyq qaýipsizdik, Qytaımen qarym-qatynas jáne AQSh-pen yntymaqtastyq máselelerin talqylady, dep habarlaıdy Kazinform agenttiginiń menshikti tilshisi.

Mınıstry oborony Evrosoıýza obsýdılı otnoshenııa s Kıtaem ı transatlantıcheskoe sotrýdnıchestvo
Foto: European Union

Kezdesýge qatysýshylar Eýroodaqtyń turaqtylyǵyn nyǵaıtý jáne jetkizý tizbeginiń syrtqy táýeldiligin azaıtý joldary jóninde pikir almasty. Bul rette strategııalyq áriptestikti damytý máselesine de nazar aýdaryldy. Mınıstrler Úndi-Tynyq muhıty aımaǵyndaǵy jaǵdaıdy jáne osy óńirdegi seriktestermen baılanysty jandandyrý qajettigin de sóz etti.

Transatlantıkalyq qaýipsizdik pen qorǵanys máselelerine qatysty mınıstrler AQSh Qorǵanys mınıstriniń saıasat jónindegi orynbasary Elbrıdj Kolbımen pikir almasty.

AQSh-tyń 2025 jylǵy Ulttyq qaýipsizdik strategııasy men 2026 jylǵy Ulttyq qorǵanys strategııasy aıasynda amerıkalyq ókil eldiń áskerı qatysýyna júrgizilip jatqan sholý jáne onyń Eýroodaqpen aldaǵy yntymaqtastyqqa yqpaly týraly aqparat berdi.

Eýropalyq mınıstrler transatlantıkalyq yntymaqtastyqtyń mańyzy zor ekenin atap ótti. Talqylaý barysynda Ýkraınaǵa birlesip qoldaý kórsetý, sondaı-aq Eýroodaq pen AQSh jáne Eýroodaq pen NATO arasyndaǵy baılanysty nyǵaıtý múmkindikteri qarastyryldy.

Ispanııa óz kezeginde keńes múshelerine «Áıelder, beıbitshilik jáne qaýipsizdik» kún tártibi boıynsha Eýroodaqtyń arnaıy ókilin taǵaıyndaý bastamasy týraly aqparat berdi.

Otyrys qarsańynda Eýroodaq elderiniń qorǵanys mınıstrleri Eýropalyq qorǵanys agenttiginiń (EDA) Basqarýshy keńesiniń otyrysyn da ótkizdi. Onda 2026 jylǵa arnalǵan qorǵanys salasyndaǵy úılestirilgen jyl saıynǵy sholý (CARD), qorǵanys salasyndaǵy jetkizilim qaýipsizdigi jónindegi birlesken málimdeme maquldanyp, agenttik bıýdjetin ulǵaıtý kelisildi.

Buǵan deıin Qazaqstan Syrtqy ister mınıstri Muhtar Tileýberdi Belgııa Koroldigi Premer-mınıstriniń orynbasary, syrtqy ister, Eýropa isteri jáne damý salasyndaǵy yntymaqtastyq mınıstri Maksım Prevomen kezdesken edi. Kelissózder Eýroodaq, Qara teńiz aımaǵy, Ońtústik Kavkaz jáne Ortalyq Azııa arasyndaǵy óńiraralyq ózara baılanys jónindegi ekinshi mınıstrlik kezdesýden keıin ótti.

Brıýsselge jumys sapary aıasynda Muhtar Tileýberdi Eýropanyń birqatar eliniń ókilderimen ekijaqty kezdesýler ótkizip, belgııalyq bıznes ókilderimen, sonyń ishinde Sarens Group, Ahlers Logistics jáne basqa kompanııalarmen kelissóz júrgizdi. Taraptar logıstıkaǵa ınvestıtsııa salý jáne Orta dálizdi tsıfrlandyrý máselelerin talqylady.