Eýroodaqtyń Halyqaralyq áriptestik jónindegi komıssary Qazaqstanǵa keledi

TAShKENT. KAZINFORM – 12-18 naýryz aralyǵynda Eýropalyq Odaqtyń Halyqaralyq áriptestik jónindegi komıssary Iozef Sıkela Ortalyq Azııanyń 5 memleketine saparlaıdy, dep habarlaıdy Kazinform agenttiginiń menshikti tilshisi.

Aıta keteıik, Iozef Sıkelanyń sapary bıyl sáýirde Ózbekstanda ótetin «EO – Ortalyq Azııa» formatyndaǵy alǵashqy sammıt qarsańynda uıymdastyrylyp otyr.

- Ortalyq Azııa Eýropalyq Odaqtyń mańyzdy seriktesi sanalady. Biz bul yntymaqtastyqtyń bolashaǵyna mol senimmen qaraımyz. Qazirgi jahandyq syn-qaterler seriktestikti júıeli jolǵa qoıýdy jáne baılanystardy nyǵaıtýdy talap etedi. Meniń maqsatym - EO men Ortalyq Azııa arasyndaǵy yntymaqtastyq negizinde bilim berý, zamanaýı ınfroqurylym jasaqtaý, sapaly jumys oryndaryn ashý salalarynda júzege asyp jatqan jobalardy baǵamdaý, - dedi Iozef Sıkela.

Sapar aıasynda, kólik-logıstıkalyq marshrýttardy damytý, onyń ishinde Orta dálizdiń áleýetin arttyrýǵa erekshe nazar aýdarylmaq. Buǵan qosa, EO men Ortalyq Azııa elderi arasyndaǵy sırek metalldar boıynsha yntymaqtastyqqa mán berilmek.

Eýropalyq Odaqtyń resmı saıtynan málim etkendeı, sapar aıasynda Iozef Sıkela atalǵan salalardy birlesip ilgeriletýge baǵyttalǵan birneshe qujatqa qol qoımaq.

Eske salaıyq, Eýroodaq pen Ortalyq Azııa elderiniń alǵashqy sammıti bıyl sáýirde Ózbekstanda ótedi. Onyń barasynda óńir memleketteri men eýroaımaq elderiniń arasyndaǵy yntymaqtastyq máseleleri qaralady.

Qosa ketsek, Eýroodaqtyń ǵylymı zertteýlerdi qarjylandyrý baǵdarlamasy Ortalyq Azııamen yntymaqtastyqty jalǵastyrmaq.