Eýroodaqtyń ǵylymı zertteýlerdi qarjylandyrý baǵdarlamasy Ortalyq Azııamen yntymaqtastyqty jalǵastyrmaq
TAShKENT. KAZINFORM – Eýropalyq odaqtyń ǵylymı zertteý jáne ınnovatsııalardy qarjylandyrý baǵdarlamasy Ortalyq Azııamen yntymaqtastyqty jalǵastyrady. Tashkentte ótken semınarǵa qatysqan aımaq elderi men eýropalyq mamandardyń oıy osyǵan saıady, dep habarlaıdy Kazinform agenttiginiń menshikti tilshisi.
«Horizon Europe» — Ortalyq Azııa aımaǵyna keń tanymal baǵdarlama. Buǵan deıin ol óńirdegi 42 joba men 62 uıymdy qarjylandyrǵan. Ǵylymı zertteý jáne ınnovatsııalyq bastamalardyń bir parasy elimizde de júzege asty.
«Nazarbaev ýnıversıtetinde „Horizon Europe“ aıasynda jasyl energetıka salasynda jańa jobalar qolǵa alyndy. Injenerııa jáne hımııa mektebi óz ótinimin joldap, jeńiske jetti. Odan bólek, osy oqý ornynyń memlekettik saıasat mektebinde áleýmettik-gýmanıtarlyq baǵyttardaǵy zertteýler qoldaý tapty», — dedi Ǵylym qory basqarma tóraǵasynyń orynbasary Álııa Sembaeva.
Qazir baǵdarlamanyń jańa kezeńindegi jobalar qarjylandyrylyp jatyr. Uıymnyń 2027 jylǵa deıingi jalpy bıýdjeti 95,5 mlrd eýro shamasynda. Qazaqstan jáne Ózbekstan ǵalymdaryna sonyń bir bóligi usynylady.
Tashkenttegi semınar barysynda «Horizon Europe» ókilderi halyqaralyq yntymaqtastyqtyń mańyzyna toqtaldy. Konkýrsqa qatysý jáne ǵylymı eńbekti jetildirý joldary túsindirildi.
«Baǵdarlamanyń múmkindikteri keń. Barlyq salaǵa qarjy tartýǵa bolady. Alaıda, biz turaqty energetıka salasyna basymdyq berip otyrmyz. Qazaqstan men Ózbekstannyń sol baǵytta usynatyn jobalary bar. „Horizon Europe“ halyqaralyq yntymaqtastyq negizinde ǵalymdardyń energetıka salasyndaǵy zertteýleri men ınnovatsııalaryn aıtarlyqtaı ilgeriletýge járdemdesedi», — dedi «SECCA» jobasynyń eýropalyq baǵdarlamalar boıynsha sarapshysy Natalıa Shatırıshvılı.
Byltyr mundaı basqosýdyń alǵashqysy Qazaqstanda uıymdastyryldy. Aldaǵy ýaqytta ol Ózbekstannan bólek, Túrikmenstan jáne Qyrǵyzstanda jalǵasyn tabady. Osy rette Eýroodaq ókilderi Ortalyq Azııadaǵy energetıkany damytýǵa atsalysyp, ǵalymdardyń bastamasyn qoldaıtynyn jetkizdi.
«Bul is-shara eýropalyq kókjıek baǵdarlamasynyń múmkindikterin keńinen túsindirýge arnaldy. Bul rette eýroodaqtyń qarjylandyrýymen jumys isteıtin „SECCA“ jobasy úshin turaqty energetıkany damytý mańyzdy ekenin aıtqym keledi. Óz kezeginde biz baǵdarlamanyń besinshi klasteri — klımat, energetıka jáne kólik baǵytymen jumys isteýdi usynamyz. Semınar eki eldiń ǵalymdaryna sol baǵyttaǵy jumysty júıeleýge, tájirıbesin arttyrýǵa jol ashady», — dep toqtaldy «SECCA» jobasynyń energetıkalyq sektor boıynsha sarapshysy Ilze Pýrınıa.