Eýroodaqtyń alty iri eli qarjy naryǵyn ıntegratsııalaýdy jedeldetýdi usyndy
ASTANA. KAZINFORM – Frantsııa, Germanııa, Italııa, Nıderland, Polsha jáne Ispanııa Eýroodaqtyń qarjy júıesin reformalaýdy jedeldetýdi, Visa men Mastercard-qa balama bolatyn tólem júıesin qurýdy jáne tsıfrlyq eýrony engizýdi surady, dep habarlaıdy Euronews.
EO-nyń alty iri ekonomıkasy Brıýsseldi kapıtal naryqtaryn uzaq ýaqyttan beri kútilip kele jatqan ıntegratsııalaýdy jedeldetýge shaqyryp otyr. Bul «Eýropanyń ósý áleýetin kúsheıtý úshin qajet» delingen Evrotop basshysyna jáne birneshe eýrokomıssarǵa joldanǵan hatta.
Frantsııa, Germanııa, Italııa, Nıderland, Polsha jáne Ispanııanyń qarjy mınıstrleri «Jınaqtar men ınvestıtsııalar odaǵyn» qurý baǵytynda naqty ilgerileýge qol jetkizý shuǵyl qajettilikke aınalǵanyn málimdep, osy mańyzdy jobany ilgeriletýge ýáde berdi.
— Tereńirek jáne bir-birimen ıntegratsııalanǵan kapıtal naryqtary Eýropanyń ósý áleýetin, onyń ekonomıkalyq egemendigin nyǵaıtady jáne basym baǵdarlamalardy qarjylandyrý úshin neǵurlym berik negiz qalyptastyrady, — delingen hatta.
Atap aıtqanda, mınıstrler EO ınstıtýttaryn jazǵa deıin múshe elder arasynda «Naryqtardy ıntegratsııalaý jáne qadaǵalaý jónindegi sharalar paketi» (MISP) boıynsha kelisimge qol jetkizýge shaqyrdy.
Bul paket — Eýropalyq komıssııa usynǵan zańnamalyq usynystar jıyntyǵy. Ol búkil odaq aıasynda qarjy naryǵy ınfraqurylymdaryn baqylaýdy kúsheıtýge jáne olardyń jumysyn jaqsartýǵa baǵyttalǵan.
— Pakettiń basty maqsaty — ulttyq kedergilerdi joıý jáne ınvestıtsııalyq qorlardy transshekaralyq bólýdi jaqsartý. Bul ınvestorlarǵa EO kapıtal naryqtaryna jaqsyraq qol jetkizýge múmkindik berip, al kompanııalarǵa keńeıtilgen kapıtal kózderiniń artyqshylyqtaryn paıdalanýǵa jol ashady, — delingen hatta.
Alty elden quralǵan top sondaı-aq EO-dan amerıkalyq Visa jáne Mastercard júıelerimen básekelese alatyn jalpy eýropalyq tólem júıesin engizýdi jedeldetýdi jáne tsıfrlyq eýroǵa kóshýdi tezdetýdi surady.
Eske sala ketsek, buǵan deıin Eýropalyq ortalyq bank tsıfrlyq eýrony múmkin bolatyn iske qosýǵa daıyndyqty 2029 jylǵa qaraı aıaqtaýdy josparlap otyrǵanyn jarııalady. Alǵashqy pılottyq jobalar men synaq tranzaktsııalary 2027 jyldyń ortasynda bastalýy múmkin.
Al EO-nyń taǵy bir eli bıyldan bastap eýroǵa kóshetinin jazdyq. Bolgarııa 2026 jylǵy 1 qańtardan bastap ulttyq valıýta — levpen resmı túrde qoshtasyp, eýrony memlekettik valıýta retinde engizdi.
Sondaı-aq jýyrda Eýroodaq elshileri álemdegi jaǵdaıdy talqylaý úshin Brıýsselde jınaldy.
