Eýroodaqtaǵy meshiti joq jalǵyz el
ASTANA. 19 qarasha. QazAqparat - Slovakııa - Eýroodaqtaǵy meshiti joq jalǵyz el. Al, slovakııalyq Islam qorynyń málimetinshe, bul memlekette qazirgi kúni 4-5 myń musylman ómir súredi.
Biraq, bul naqty derek emes. Sebebi, ıslam Slovakııada resmı tanylmaǵan ári memlekettik tirkeýden ótpegen din. Sondyqtan, basqa Eýropa elderindegi musylmandar sanynyń kóbeıip kele jatqanyna qarap, Slovakııadaǵy ıslam dinin ustanýshylar qatary da atalǵan kórsetkishke qaraǵanda áldeqaıda kóp bolýy yqtımal.
Bratıslavadaǵy Islam qorynyń negizin qalaýshy Muhammed Hasna Slovakııada birde-bir meshittiń bolmaýyn ádiletsizdik dep sanaıdy. Onyń aıtýynsha, qor Bratıslava ákimshiligine meshit salýǵa jer berý týraly qanshama márte ótinishpen shyqqanymen, ol talaptary qanaǵattandyrylmaǵan.
Qazirgi ýaqytta el astanasynyń musylman jamaǵaty óz gazetin shyǵaryp, din boıynsha arnaıy kýrstar ótkizip, muqtaj jandarǵa kómektesip turady. Qordyń basty maqsaty - ıslamdy osy eldegi resmı tanylǵan din etý, dep habarlady muslim.kz.
Aıta ketý kerek, 2007 jyly Slovakııa parlamenti dinı birlestikterdi memlekettik tirkeýden ótkizý úshin onyń qataryndaǵy adamdar sany 20 myńnan asýy kerek degen zań qabyldaǵan bolatyn.
