Eýroodaqta jasandy ıntellekttiń ashyqtyǵyna qoıylatyn talaptar kúshine endi

ASTANA. KAZINFORM — EO-da jasandy ıntellekt (JI) tehnologııalaryn ázirleýshiler endi óz modelderiniń jumys isteý prıntsıpteri men olardy úıretý úshin qoldanylǵan derekter týraly ashyq aqparat berýge mindetti. Qoǵam úshin táýekel kózi bolyp sanalatyn eń ozyq úlgiler qaýipsizdik sharalaryn qujattaýy tıis.

Eýropalyq Odaqta jalpy maqsattaǵy jasandy ıntellekt júıelerine qatysty ashyqtyq talaptary resmı túrde kúshine endi. Bul talaptar mátin, sýret nemese kod generatsııalaı alatyn ChatGPT, Gemini sekildi chat-bottarǵa da qatysty.

Jańa erejelerdiń negizgi talaptary:

• JI ázirleýshileri óz modelderiniń qalaı jumys isteıtinin,

  sondaı-aq olardy úıretý úshin qoldanylǵan derek kózderin jarııalaýy tıis.

• Qoǵamǵa táýekel tóndirýi múmkin dep tanylǵan modelder qaýipsizdik sharalary boıynsha qujattamalyq esep berýi kerek.

• Bul sharalar ıntellektýaldyq menshik pen avtorlyq quqyqtardy qorǵaý úshin de engizildi.

Jeke azamattar da JI-ge qarsy sotqa shaǵymdana alady

2025 jyldyń 2 tamyzynan bastap EO azamattary jasandy ıntellekt quqyqtaryn buzsa, oǵan sotqa júginý múmkindigine ıe boldy.

2026 jyldyń tamyzynan bastap Eýropalyq jasandy ıntellekt jónindegi baqylaý organy (European AI Office) jańa modelderdi teksere bastaıdy, al 2025 jylǵy 2 tamyzǵa deıin shyqqan modelder 2027 jyldyń tamyzynan bastap tekserilmek.

Sarapshylardyń boljamy boıynsha, bul erejelerdi buzǵan jaǵdaıda salynatyn aıyppul kólemi 17,1 mıllıon AQSh dollaryna (shamamen 14,75 mıllıon eýroǵa) deıin jetýi múmkin. Bul soma JI qyzmetteri naryǵynyń jyldyq kóleminiń 3%-yn quraıdy.

Eýropa jasandy ıntellektti qatań retteı bastady

Jasandy ıntellekt týraly álemdegi alǵashqy halyqaralyq zańdy Eýroparlament 2024 jylǵy 13 naýryzda, al EO-ǵa múshe elderdiń beıindi mınıstrleri 21 mamyrda maquldaǵan bolatyn.

Bul zańnyń maqsaty — joǵary táýekelge ıe jasandy ıntellektten negizgi quqyqtardy, demokratııany, zań ústemdigin jáne ekologııalyq turaqtylyqty qorǵaý.

2025 jyldyń 2 aqpanynda, ótpeli kezeń aıaqtalǵannan keıin, EO-da JI qoldaný boıynsha alǵashqy erejeler kúshine endi.

Tyıym salynǵan áreketter:

• EO elderinde azamattarǵa “áleýmettik reıtıng” júıesin jasaýǵa JI qoldanýǵa tyıym salynǵan

  (mundaı júıe Qytaıda bar).

• Emotsııany taný tehnologııasyn jumys oryndarynda jáne oqý oryndarynda qoldanýǵa bolmaıdy.

• JI arqyly adamdardyń minez-qulqyna áser etý, olardyń osal toptaryna áser etý nemese manıpýlıatsııa jasaý da tyıym salynǵan.

  Mysaly, qart adamdardy aldaý úshin qoldanylatyn “robot-qońyraýlar” osy tyıymǵa jatady.

Kameralar arqyly qoǵamdyq oryndarda adamnyń bet-álpetin taný júıesi EO aýmaǵynda negizinen ruqsat etilmeıdi.

Biraq terrorızm men adam saýdasy sııaqty qylmystardy tergeý barysynda quqyq qorǵaý organdaryna bul tehnologııany qoldanýǵa erekshe ruqsat berilgen.

Aıta keteıik, AQSh pen Qytaı jasandy ıntellekt salasynda kóshbasshy atandy.

Al Qazaqstanda 1 tamyzdan bastap ChatGPT-ge jazylý quny QQS-qa baılanysty qymbattaıdy.