Eýroodaqta satylmaǵan kıimdi joıýǵa tyıym salynady
ASTANA. KAZINFORM — Eýropalyq odaqta kompanııalarǵa satylmaı qalǵan kıim-keshekti joıýǵa tyıym salynbaq, dep habarlaıdy DW basylymy.
Basylymnyń málimetinshe, iri óndirýshiler úshin bul tyıym 19 shildeden bastap kúshine enedi. Al qalǵan kásiporyndar 2030 jylǵa deıin satylmaǵan kıim qaldyqtaryn joıý tájirıbesinen tolyq bas tartýy tıis.
Sonymen qatar birqatar erekshelik qarastyrylǵan. Máselen, zaqymdanǵan taýarlar nemese gıgıenalyq talaptarǵa baılanysty joıý qajet bolǵan jaǵdaılar bul tyıymǵa kirmeıdi. Degenmen kompanııalar qandaı taýarlardy ýtılızatsııalaǵany týraly ashyq aqparat berýge mindetteledi.
DW málimetinshe, jańa talaptar naryqtaǵy qazirgi jaǵdaıdy ózgertýge baǵyttalǵan. Qazir toqyma ónimderin joıý olardy qaıta óńdeýge qaraǵanda arzanyraq bolǵandyqtan, jyl saıyn EO aýmaǵynda mıllıondaǵan kıim-keshek qoqysqa tastalady.
— Bul jaǵdaıǵa onlaın-saýda da yqpal etip otyr. Internet arqyly satyp alynǵan taýarlardyń edáýir bóligi keri qaıtarylady, al kompanııalar úshin olardy qaıta satýǵa daıyndaǵannan góri joıý ońaıyraq. Eýrokomıssııa dereginshe, Eýroodaqta satylmaı qalǵan aıaq kıim men kıimniń shamamen 10 paıyzy joıylady, kóbine olardy órteıdi. Nátıjesinde jyl saıyn atmosferaǵa shamamen 5,6 mıllıon tonna kómirqyshqyl gazy bólinedi. Bul kórsetkish, mysaly, búkil Shvetsııa eliniń CO₂ shyǵaryndylarynan da joǵary. Tek Germanııanyń ózinde onlaın-saýda salasynda jyl saıyn shamamen 20 mıllıon qaıtarylǵan taýar ýtılızatsııalanady. Bul ekologııa men klımatqa aıtarlyqtaı zııan keltiredi, — delingen habarlamada.
Osyǵan baılanysty Eýrokomıssııa kompanııalardy taýar qoryn tıimdi basqarýǵa, qaıtarylǵan ónimderdi qaıta óńdeýge jáne balama joldardy qarastyrýǵa yntalandyrmaq. Atap aıtqanda, kıimdi qaıta satý, qaıta óńdeý nemese muqtaj jandarǵa berý usynylady.
Aıta keteıik, Eýroodaqqa múshe 27 el basshylarynyń kelesi sammıti Belgııanyń aýyldyq aımaǵyndaǵy Olden-Bızen qamalynda ótedi. Jıyn barysynda Qytaı men AQSh sekildi básekelester aıasynda EO-nyń básekege qabilettiligi talqylanady.
Kún tártibinde biryńǵaı naryqty biriktirý jáne Eýroodaq ekonomıkasynyń aýqymyn tıimdi paıdalaný arqyly qurlyqtyń jahandyq básekeden shet qalmaýyn qamtamasyz etý máselesi tur.