Eýroodaqta ár on sábıdiń tórteýi nekesiz týady
BRıÝSSELЬ. QazAqparat - Eýropa odaǵynyń statıstıkalyq qyzmeti júrgizgen zertteý jaǵa ustatar nátıjeni kórsetti: sábılerdiń 40 paıyzy nekesiz týady eken, dep habarlaıdy «QazAqparat» HAA-nyń menshikti tilshisi.
«2016 jyly Eýropa odaǵynda 5,1 mıllıonnan astam sábı dúnıege kelgen. Odaqqa múshe 28 eldiń segizinde nárestelerdiń basym kópshiligi nekesiz týǵan», - dep málimdedi Eýrostat.
Nekesiz týý kórsetkishi Frantsııada aıtarlyqtaı joǵary. Onda sábılerdiń 59,7%-y nekesiz týady. Frantsııadan keıingi oryndarda 58,6% kórsetkishimen Bolgarııa men Slovenııa keledi.
Sonymen qatar, Estonııa (56,1%), Shvetsııa (54,9%), Danııa (54%), Portýgalııa (52,8%), Nıderlandy (50,4%) elderinde de nekesiz týý kórsetkishi joǵary.
Grekııada, kerisinshe, nekesiz týý kórsetkishi nebári 9,4%-dy quraıdy. Sondaı-aq, Horvatııada (18,9%), Kıprde (19,1%) jáne Polshada (25,0%) da sábıler negizinen tolyq otbasynda dúnıege keledi.
Lıtva (27,4%) men Italııada (28%), Rýmynııa (31,3%) men Maltada (31,8%) balalardyń nekesiz týý kórsetkishi bir-birine jýyqtaý.
Eýropa odaǵynyń statıstıka qyzmeti ókilderiniń aıtýynsha, nekesiz týǵan balalardyń úlesi Odaqqa múshe elderde 2000 jylmen salystyrǵanda birshama ósken.
Nekesiz týý kórsetkishi Jerorta teńizi elderinde, atap aıtqanda, Kıprde segiz ese, Malta men Italııada úsh ese, Ispanııa men Grekııada eki ese artqan.
Al Skandınav túbeginde, Baltyq boıy elderinde, Irlandııa jáne Ulybrıtanııada 2000-2016 jyldardaǵy kórsetkishtiń arasynda ózgeris joqtyń qasynda.
foto: sibdepo.ru
