Eýroodaqta 2 tamyzdan bastap JI-ge qatysty jańa erejeler kúshine enedi
ASTANA. KAZINFORM – 2 tamyzdan bastap Eýropalyq komıssııa men Eýroodaqqa múshe memleketterdiń ulttyq organdary Jasandy ıntellekt týraly zańnyń (AI Act) erejelerin qoldana bastaıdy. Sol kúni jasandy ıntellekt júıeleriniń ashyqtyǵyna qatysty jańa talaptar da kúshine enedi, dep habarlaıdy Eýropalyq komıssııa.
Jańa erejelerge sáıkes, chat-bottar men basqa da ınteraktıvti jasandy ıntellekt júıeleri paıdalanýshylarǵa olardyń adammen emes, jasandy ıntellektimen baılanysyp otyrǵanyn habarlaýǵa tıis.
Sonymen qatar jasandy ıntellekt kómegimen jasalǵan nemese ózgertilgen sýretter, beınejazbalar men aýdıomaterıaldar, sonyń ishinde dıpfeıkter arnaıy tańbalanýy kerek. Jasandy ıntellekt arqyly jasalǵan nemese óńdelgen kontentte onyń shyǵý tegin anyqtaýǵa múmkindik beretin mashına oqı alatyn belgiler de bolýy qajet.
Eýropalyq komıssııanyń málimetinshe, jańa talaptar aldaý men manıpýlıatsııa qaýpin azaıtýǵa, jasandy ıntellektini paıdalanýdyń ashyqtyǵyn arttyrýǵa jáne bızneske zań talaptaryn oryndaýdyń naqty tártibin usynýǵa baǵyttalǵan.
Sonymen birge jasandy ıntellektiniń kómegimen jasalǵan kontenttiń ashyqtyǵyn qamtamasyz etý jónindegi tájirıbe kodeksine qol qoıǵan 180-nen astam uıymnyń alǵashqy tizimi jarııalandy.
2 tamyzdan bastap Eýropalyq komıssııa tsıfrlyq servısterdiń keń aýqymynda, onyń ishinde jasandy ıntellekt agentterinde qoldanylatyn ámbebap jasandy ıntellekt modelderin (General-Purpose AI, GPAI) jetkizýshilerdiń AI Act talaptaryn saqtaýyn baqylaý ókilettigine ıe bolady.
Júıelik táýekelder týǵyzýy múmkin asa qýatty modelderge qosymsha talaptar engiziledi. Olardy ázirleýshiler kıbershabýyldarǵa, jasandy ıntellekt júıelerin baqylaýdan aıyrylýǵa, qaýipti manıpýlıatsııalarǵa, sondaı-aq hımııalyq, bıologııalyq, radıologııalyq jáne ıadrolyq qaterlerge baılanysty táýekelderdi baǵalap, azaıtýǵa mindetti.
Ámbebap jasandy ıntellekt modelderin jetkizýshilerdiń barlyǵy óz modelderi týraly aqparatty qujattap, avtorlyq quqyq salasyndaǵy saıasatty saqtap, olardy oqytýda qoldanylǵan derekter týraly jetkilikti dárejede egjeı-tegjeıli málimet jarııalaýǵa tıis.
Talaptardyń oryndalýyn Eýropalyq komıssııanyń Jasandy ıntellekt jónindegi keńsesi, Eýroodaq elderiniń ulttyq quzyretti organdary, sondaı-aq Eýroodaq ınstıtýttary men organdary paıdalanatyn júıelerge qatysty Eýropalyq derekterdi qorǵaý ınspektory baqylaıdy.
AI Act talaptarynyń yqtımal buzylýy týraly habarlamalardy qabyldaý úshin Eýropalyq komıssııa azamattarǵa, kompanııalar men aqparat berýshilerge arnalǵan arnaıy tsıfrlyq quraldardy da iske qosty.
Eske sala ketspek, buǵan deıin Eýropalyq odaq osy saladaǵy básekege qabilettilikti arttyrý jáne tehnologııalyq táýelsizdikti nyǵaıtý maqsatynda Eýropada jasandy ıntellektiniń jeti gıgafabrıkasyn qurý jónindegi jumysyn bastaǵanyn jazdyq.
