Eýroodaq zııandy qaldyq shyǵaratyn kólikterge qoıylǵan tyıymdy alyp tastady

ASTANA. QazAqparat – Eýroodaq 2035 jylǵa qaraı ishki janý qozǵaltqyshtary bar jańa avtokólik pen fýrgondardy satýǵa tyıym salý týraly sheshimin toqtatty. Juma kúni múshe elder bul kelisimdi ratıfıkatsııalaýǵa daýys berýdi keıinge qaldyrdy, dep habarlaıdy QazAqparat Euronews agenttigine silteme jasap.

Tórt el – Germanııa, Italııa, Polsha men Bolgarııa mundaı tyıymnyń saldaryna alańdaıtynyn bildirdi. Berlın jańartylatyn kózderden alynǵan sıntetıkalyq otynmen jumys isteıtin avtokólikterdi bul tizimge qospaýdy, Brıýsselden mátindi ózgertýdi surady. Basqa elder elektrokarǵa kóshý múmkin ekenine senbeıdi.
Eýrokomıssııa ókili Dana Spınant «Biz ary qaraı qaı jolmen júrgen durys ekenin sheshý jáne túrli saýaldarǵa jaýap berý úshin ózimiz de mundaı qaýip-qaterdi anyq túsinip alýymyz kerek» deıdi.
Zııandy sorǵyshty nólge jetkizý – ǵasyr ortasyna qaraı klımat beıtaraptyǵyna qol jetkizetin negizgi sharalardyń biri. Eýropa parlamenti ony ótken aıda daýys berýshilerdiń sál ǵana basymdyǵymen maquldady. Sodan keıin zańnama naqty bekitý úshin múshe-elderge berildi. Sol kezde janarmaı men dızel otynymen júretin kólikterden bas tartý týraly sheshimge qatysty daý týdy. Brıýssel 2035 jyldan bastap EO naryǵynda satylatyn barlyq kólikterdiń kómirqyshqyl gazy qaldyqtaryn 100%-ǵa qysqartýdy kózdep otyr.
Eýrokomıssııa mundaı qysqa merzimdi aıtqan sebebi avtokólikterdiń ortasha qyzmet etý ýaqyty 15 jyl, al EO elderiniń «Jasyl kelisimi» jalpy ekonomıka, onyń ishinde kóliktiń de 2050 jylǵa qaraı ekologııalyq taza bolǵanyn qalaıdy.
Byltyr Italııa, Portýgalııa, Slovakııa, Bolgarııa men Rýmynııa ınfraqurylymdy elektr kóligine yńǵaılastyrýǵa uzaǵyraq ýaqyt berý úshin tyıymdy 2035 jyldan 2040 jylǵa aýystyrýǵa shaqyrdy.
Daýys berý ýaqytyn keıinge qaldyrý týraly sheshimdi EO-ta tóraǵalyq etip otyrǵan Shvetsııa qabyldady. Ol múshe elder «ýaqyty kelgende» bul máselege qaıta oralatynyna ýáde berip, naqty merzimin aıtqan joq.