Eýroodaq «jasyl energetıkaǵa» ótetin kezde gaz ben atom energetıkasy qoldanylady
BRıÝSSELЬ. QazAqparat – Sársenbide Eýropalyq komıssııa «jasyl ınvestıtsııalarǵa» salymdy retteıtin turaqty qarjylandyrý erejeleriniń jıyntyǵyn jarııalady, dep habarlaıdy QazAqparat menshikti tilshisi.
Taksonomııa (jikteý) Eýroodaq elderiniń «Jasyl mámilesinde» – 2050 jylǵa qaraı kómirtegi beıtaraptyǵyna qol jetkizýge baǵyttalǵan ekonomıkalyq damý strategııasynda basty oryn alady.
Jeke kapıtaldy ekologııalyq taza dep tanylǵan energııa kózderine salýǵa bolady. Maqsat - barlyq múmkindikterdi qoldana otyryp, «jasyl energııaǵa» kóshýdi jedeldetý. EO basshylyǵy ǵylymı usynystardy eskere otyryp, ótpeli kezeńde gaz jáne ıadrolyq qyzmetke jeke ınvestıtsııalar tartý mańyzdy ról atqarady dep esepteıdi.
Osy aptada qabyldanǵan erejelerde gaz jáne ıadrolyq energetıka EO-nyń klımattyq jáne ekologııalyq maqsattaryna sáıkes keletini jáne Eýropaǵa kómir óndirisi sııaqty aýa lastaıtyn qyzmet túrlerine qaraǵanda, negizinen jańartylatyn energııa kózderine negizdelgen klımattyq beıtarap bolashaqqa kóshýdi tezdetýge múmkindik beretini aıtylǵan.
«EO 2050 jylǵa qaraı klımattyq beıtaraptyqqa qol jetkizýge daıyn jáne biz oǵan qol jetkizý úshin barlyq quraldardy qoldanýymyz kerek. Ótpeli kezeńdegi jeke ınvestıtsııalardy jandandyrý bizdiń klımattyq maqsattarymyzǵa jetýdiń kilti», - dedi qarjy qyzmeti jónindegi komıssar Meırıd MakGınness.
Avtory: Arnur Rahymbekov
