Eýroodaq jasandy ıntellektige arnalǵan jeti gıgafabrıka salýdy josparlap otyr
ASTANA. KAZINFORM – Eýropalyq odaq jasandy ıntellekt salasyndaǵy básekege qabilettilikti arttyrý jáne tehnologııalyq táýelsizdigin nyǵaıtý maqsatynda Eýropada jasandy ıntellekt gıgafabrıkasyn qurýǵa arnalǵan tenderlik úderisti bastady, dep habarlaıdy Anadoly.
Málimdemege sáıkes, sala ókilderi jetekshilik etetin bul bastama EO jáne ulttyq qorlardan bólinetin 10 mlrd eýroǵa deıingi qarjylyq qoldaýdyń arqasynda júzege asady. Joba aıasynda keminde 20 mlrd eýro kóleminde jeke ınvestıtsııa tartý kózdelip otyr.
Joba Eýropanyń jasandy ıntellekt salasyndaǵy esepteý qýatyn edáýir arttyrýǵa múmkindik beredi. Sonyń nátıjesinde startaptar, qarqyndy damyp kele jatqan kompanııalar, shaǵyn jáne orta bıznes, ónerkásiptik uıymdar, ǵylymı mekemeler men memlekettik qurylymdar ozyq jasandy ıntellekt modelderin ázirleýge jáne oqytýǵa qajetti joǵary ónimdi ınfraqurylymǵa qol jetkizedi.
Málimdemede JI gıgafabrıkalary zamanaýı jasandy ıntellekt protsessorlaryn, baǵdarlamalyq qamtamasyz etýdi, bultty tehnologııalardy, joǵary jyldamdyqty baılanys ınfraqurylymyn jáne energııany únemdeıtin derekterdi óńdeý ortalyqtaryn biriktiretini atap ótilgen.
Eýropa boıynsha qurylatyn 19 jasandy ıntellekt fabrıkasynyń jelisimen birge bul ınfraqurylym óńirdiń tehnologııalyq kóshbasshylyǵyn, ornyqtylyǵyn jáne strategııalyq derbestigin nyǵaıtýǵa tıis.
Sondaı-aq bastama Eýropaǵa jasandy ıntellektini óz qaǵıdalary men qundylyqtaryna saı damytýǵa múmkindik beredi. Bul kásiporyndarda ázirlenetin tehnologııalar EO-nyń derekterdi qorǵaý, qaýipsizdik jáne etıka salasyndaǵy talaptaryna sáıkes bolady.
Osylaısha, Eýroodaq jasandy ıntellekt salasynda AQSh pen Qytaıǵa táýeldilikti azaıtýdy kózdep otyr.
Aıta ketelik elimizde jasandy ıntellekt pen startapty damytý boıynsha halyqaralyq ınnovatsııalyq hab qurylady.
