Eýroodaq janýarlardy qorǵaý sharalaryn qatańdatty
ASTANA. KAZINFORM — Eýroodaqtyń barlyq elinde úı janýarlaryn ustaý, ósirý jáne satý boıynsha biryńǵaı erejeler engiziledi, dep habarlaıdy DW.
Mundaı zańdy Eýropa parlamentiniń depýtattary qabyldady, endi ony EO Keńesi maquldaýy tıis.
Negizgi jańalyqtardyń biri — barlyq ıtter men mysyqtardy mindetti túrde chıpteý jáne ulttyq derekter bazasyna tirkeý. Sonymen qatar janýarlardy densaýlyǵyna zııan keltiretin belgilermen kóbeıtýge jáne jaqyn týystaryn bir-birimen shaǵylystyrýǵa tyıym salynady.
Budan bólek, qatygez áreketterge shekteý engiziledi: janýarlarǵa kórme úshin zaqym keltirýge, qaýipti qarǵybaýlardy qoldanýǵa jáne EO-dan tys jerlerden zańsyz ákelýge bolmaıdy.
Eýroodaqqa úı janýarlaryn ákeletinderdiń barlyǵy olardy keminde bes jumys kún buryn chıptep, ulttyq derekter bazasyna tirkeýi tıis. Bul talap kommertsııalyq emes tasymaldarǵa da qatysty.
— Úı janýary — bul otbasynyń múshesi, zat nemese oıynshyq emes, — dedi aýyl sharýashylyǵy jáne aýyldyq aýmaqtardy damytý komıtetiniń basshysy Veronıka Vrechıonova.
Buǵan deıin byltyr Eýropalyq Odaqtaǵy mıgranttar sany rekordqa jetkenin jazdyq.
