Eýroodaq jáne Parsy shyǵanaǵy elderi Irannyń shabýyldaryn aıyptap, shıelenisti azaıtýǵa shaqyrdy
ASTANA. KAZINFORM — Eýropalyq Odaq pen Parsy shyǵanaǵy yntymaqtastyǵy keńesine múshe elderdiń Syrtqy ister mınıstrleri shuǵyl jıynda Irannyń soqqylaryn qatań aıyptap, Tegerandy shabýyldardy dereý toqtatýǵa shaqyrdy.
Otyrysqa Bahreın Syrtqy ister mınıstri Abdýllatıf bın Rashıd ál Zaıanı bastaǵan Parsy shyǵanaǵy yntymaqtastyǵy keńesine múshe elderdiń Syrtqy ister mınıstrleri qatysty. Eýropalyq Odaq delegatsııasyn Syrtqy ister jáne qaýipsizdik saıasaty jónindegi joǵary ókili Kaıa Kallas basqardy.
GCC Bas hatshysy Djasem Mohamed Albýdaıvı kezdesýdiń aımaq úshin mańyzdy sátte ótip jatqanyn málimdedi.
— Búginde daǵdarystar toǵysyp, oqıǵalar qarqyndy túrde damyp jatyr. Bul halyqaralyq qaýymdastyqtyń halyqaralyq tártip qaǵıdattaryna qanshalyqty berik ekenin synaýda, — dedi ol.
Onyń aıtýynsha, GCC elderi ondaǵan jyldar boıy aımaqtyń turaqtylyǵynda mańyzdy ról atqaryp keledi. Sondaı-aq álemdik ekonomıkada senimdi seriktesi atanǵan.
— Alaıda olar agressııanyń nysanasyna, janama qaqtyǵystardyń alańyna nemese aldaý men aramdyq qurbanyna aınalýǵa kelispeıdi, — dep basa aıtty ol.
Bas hatshy Irannyń zymyrandary men ushqyshsyz ushaqtary ómirlik mańyzdy azamattyq ınfraqurylymdy nysanaǵa alǵanyn atap ótti.
— Bul halyqaralyq gýmanıtarlyq quqyqty óreskel buzý, tipti dıplomatııalyq mıssııalardyń qol suǵylmaýyna áser etedi, bul Dıplomatııalyq qarym-qatynastar týraly Vena konventsııasynyń aıqyn buzylýy, — dedi Albýdaıvı.
Ol mundaı áreketterdiń halyqaralyq quqyqqa qaıshy ekenin basa aıtty.
— GCC memleketteri halyqaralyq quqyq pen jahandyq tártip qaǵıdattaryna tolyqtaı adal bola otyryp, ózin-ózi qorǵaýda ajyramas quqyqtaryn saqtaıdy, — dedi ol.
Bas hatshy Ormýz buǵazynyń jabylýy jáne saýda kemelerine jasalǵan shabýyldar jahandyq saýda men energetıkalyq qaýipsizdikke qaýip tóndiretinin aıtty.
Sondaı-aq mınıstrler Irandy ıadrolyq jáne ballıstıkalyq zymyrandyq baǵdarlamalaryn shekteýge, aımaqtaǵy turaqsyzdyqty týdyratyn áreketterdi toqtatýǵa shaqyrdy jáne shıelenisti azaıtý úshin dıplomatııalyq kúsh-jigerdi qoldaıtyndyǵyn rastady. Taraptar teńiz joldarynyń, sonyń ishinde Ormýz jáne Bab-el-Mandeb buǵazdarynyń qaýipsizdigin, sondaı-aq jahandyq energetıkalyq naryqtar men jetkizý tizbeginiń turaqtylyǵyn qamtamasyz etýdiń mańyzdylyǵyn atap ótti.
GCC — alty arab memleketin biriktiretin aımaqtyq úkimetaralyq uıym: Saýd Arabııasy, Birikken Arab Ámirlikteri, Kýveıt, Oman, Katar jáne Bahreın. Uıym elder arasyndaǵy saıası, ekonomıkalyq jáne áleýmettik-mádenı salalardaǵy yntymaqtastyqty retteıdi.
Esterińizge sala keteıik, 28 aqpanda Izraıl AQSh-tyń qoldaýymen Iranǵa qarsy áskerı operatsııasyn bastap, Taıaý Shyǵystaǵy qaqtyǵystyń jańa kezeńin ashty.
