Eýroodaq jańa vaktsına – Novavax-ty satyp alýǵa kelisim jasasty
BRıÝSSELЬ. QazAqparat – Eýrokomıssııa synaqtan ótip jatqan COVID-19-ǵa qarsy jańa - «Novavax» vaktsınasyn jetkizý týraly kelisimshartqa qol qoıdy, dep habarlaıdy QazAqparat menshikti tilshisi.
Bul – Eýrokomıssııa koronavırýs ınfektsııasyna qarsy vaktsına óndirýshilermen jasasqan 7-inshi kelisim.
Atalǵan kelisimshartqa sáıkes, EO-ǵa múshe memleketter bastapqyda «Novavax» vaktsınasynyń 100 mln dozasyna deıin satyp ala alady. 2021-2023 jyldar ishinde osy preparatty Eýropalyq dárilik zattar jónindegi agenttik «qaýipsiz jáne tıimdi» vaktsına retinde qarastyryp, bekitkennen keıin taǵy 100 mln dozaǵa qosymsha tapsyrys berý múmkindigi bar.
Sondaı-aq, EO-ǵa múshe memleketter vaktsınalardy tabysy tómen jáne ortasha elderge baǵyttaı alady nemese basqa Eýropa elderine jibere alady.
2021 jyly dári-dármekter salasyndaǵy eýropalyq organ «Novavax» vaktsınasy boıynsha óz qorytyndysyn jasaıdy dep kútilýde.
Amerıkanyń «Novavax» kompanııasy ázirlegen COVID-19-ǵa qarsy NVX-CoV2373 vaktsınasy AQSh pen Meksıkadaǵy aýqymdy synaqtar kezinde osy vırýsqa qarsy, onyń ishinde onyń ártúrli mýtatsııalaryna qarsy 90% tıimdilikti kórsetken.
