Eýroodaq Ýkraınaǵa 20 mlrd. eýro bólýge daıyn

ASTANA. QazAqparat - Ýkraınany bankrottyqtan qutqarý úshin aýqymdy qarjylyq kómek kerek. Bul týraly Sıdneıde G20 qarjy mınıstrleri men ortalyq bankter basshylary kezdesýinde Qarjy boıynsha eýrokomıssar Ollı Ren málim etti.

Sheteldik BAQ-tyń málimetinshe, Eýropalyq odaq Ýkraınanyń jańa Úkimetine 20 mlrd. eýro bólýge daıyn ekenin alǵa tartýda. Bul qarjy bul eldi defolttan saqtap qalýǵa múmkindik beredi. Halyqaralyq valıýta qorynyń basshysy Krıstın Lagardtyń aıtýynsha, halyqaralyq qoldaý kórsetý úshin bul elde ekonomıkalyq reformalar bastalýy qajet. Sonymen qatar EO-nyń Syrtqy saıasat boıynsha joǵarǵy ókili Ketrın Eshton búgin Kıevke kelip, ekonomıkany turaqtandyrý sharalaryn talqylaýdy kózdep otyr. Esterińizge sala keteıik, budan buryn Eýropalyq odaq Kıev HVQ-men kelisimge otyrǵan jaǵdaıda Ýkraınaǵa ekonomıkalyq kómek kórsetýge daıar ekenin málimdegen. Aıta keteıik, jeksenbide ýkraınalyq Joǵarǵy Radanyń tóraǵasy Aleksandr Týrchınov memlekettik qazynanyń esep-shotynda qarjy joqtyń qasy ekenin aıtqan bolatyn.