Eýroodaq Túrkııaǵa dástúrli donerge eksklıýzıvti quqyq berýden bas tartty

ASTANA. KAZINFORM – Túrkııa doner óndirýshiler qaýymdastyǵy (UDOFED) dástúrli túrik döner taǵamyn Eýropalyq odaqtyń resmı standarty retinde tirkeýge tyrysqanymen, bul bastama sátsiz aıaqtaldy, dep habarlaıdy agenttiktiń menshikti tilshisi.

Eger ótinish qabyldansa, EO elderinde tek túrik retsepti boıynsha daıyndalǵan taǵam ǵana «doner kebab» ataýyn paıdalana alatyn edi.

Al Eýropada keń taraǵan basqa retseptter bul ataýdan aıyrylady.

Atalǵan bastama, ásirese Germanııada alańdaýshylyq týdyrdy. Sebebi bul elde doner keń taraǵan kóshe taǵamdarynyń biri sanalady. Germanııa doner óndirýshiler qaýymdastyǵynyń ókili Erdogan Kochtyń aıtýynsha, ótinish maquldansa, jaǵdaı aýyr bolar edi.

– Germanııada satylyp jatqan donerdiń 95 paıyzyn sórelerden alyp tastaýǵa týra keler edi, – dedi ol.

Túrkııa ótinishinde tyıymǵa ilikkenderdiń qatarynda sıyr etin paıdalaný, marınad túrlerin qoldaný, dámdeýishter men etti daıyndaý tásilderi de bar. Mundaı jaǵdaıda eýropalyq döner óziniń úırenshikti dámi men syrtqy túrinen aıyrylyp qalar edi.

Germanııada doner tek taǵam emes, mádenı biregeıliktiń de bir bóligi bolyp ketken. Keıbir saıasatkerler ony súıikti taǵamy dep ataıdy. Ásirese, Bavarııadaǵy Hrıstıan-áleýmettik odaǵy partııasy kóshbasshysy Markýs Zeder erekshe kózge tústi. Partııa «Söder Kebab» logotıpin tirkep, onda grıldiń janynda doner ustap turǵan Zederdiń sýretin beınelegen.

Sonymen qatar olar «Söner» atty «nemis donerin» bildiretin jańa brendti de zańdy túrde bekitken.

Osylaısha, Germanııanyń «Söner» brendi Túrkııanyń EO aýmaǵynda donerge monopolııa ornatý talpynysyna jaýap retinde usynyldy.

Eske salaıyq, buǵan deıin Túrkııada jeksenbi kúnderi dúkenderdi jabý usynyldy.