Eýroodaq Túrkııa azamattary úshin Shengen vızalaryn rásimdeýdi jeńildetti
ASTANA. KAZINFORM — Eýropalyq Odaq Túrkııa azamattary úshin Shengen vızalaryn alý erejelerin jeńildetti. Bul týraly juma kúni Túrkııadaǵy EO elshisi Tomas Hans Ossovskı málimdedi, dep habarlaıdy Kazinform tilshisi.
Reuters agenttiginiń málimetinshe, Ankaradaǵy eýropalyq dıplomat Túrkııa azamattary úshin vızasyz rejım týraly kelissózderdi qaıta bastaýǵa shaqyrdy.
Kóp jyldan beri Túrkııa azamattary Eýropalyq Odaqtyń vıza júıesine shaǵymdanyp kelgen. Eýroodaq óz kezeginde akkredıttelgen vıza agenttikteri óńdeıtin ótinishterdiń tym kóptigine baılanysty protsesterdiń baıaý júrip jatqanyn aıtyp, Ankaramen bul máseleni sheshýdiń múmkin joldaryn talqylap jatqanyn jetkizdi.
EO elshisi Tomas Hans Ossovskı jańa erejeler Túrkııa azamattarynyń bıýrokratııalyq rásimderge qatysty shaǵymdaryn azaıtýǵa kómektesedi degenmen, bul tolyq sheshim emes ekenin eskertti.
— Bul Túrkııa azamattary úshin áldeqaıda ońaı ári jyldam bolady, — dedi Ossovskı Ankarada jýrnalısterge.
Onyń aıtýynsha, bul 15 shildeden bastap kúshine engen Eýropalyq komıssııanyń jańa sheshimimen baılanysty. Jańa ereje Túrkııa azamattary úshin kóp márteli vızalardy alýdy jeńildetedi.
Máselen, buǵan deıin Shengen vızasyn durys rásimdegen Túrkııa azamattary ekinshi ótinish berý kezinde alty aılyq vıza, odan keıin bir jyldyq, úsh jyldyq jáne bes jyldyq kóp márteli vızalar ala alady.
Túrkııa Syrtqy ister mınıstrligi bul qadamdy quptap, Túrkııa ınstıtýttary men Eýrokomıssııa vızalyq rejımdi odan ári jeńildetý úshin jumysyn jalǵastyratynyn málimdedi.
Túrkııanyń saýda mınıstri Ómer Bolat bul sharany «azamattar uzaq kútken jeńildik» dep baǵalady.
Ó.Bolat memlekettik Anadolu agenttigine bergen suhbatynda Túrkııa EO-men Keden odaǵyn jańartý jóninde kelissózderdi bastaǵysy keletinin jáne bul kelisimdi qyzmet kórsetý men elektrondy saýda salalaryna deıin keńeıtýdi kózdeıtinin aıtty.
Túrkııa 1999 jyldan beri EO-ǵa múshe bolýǵa kandıdat el sanalady. Alaıda ártúrli sebepterge, sonyń ishinde adam quqyqtary men demokratııalyq normalardan aýytqýǵa baılanysty bul úderis uzaq jyldarǵa toqtap qalǵan. Sońǵy ýaqytta ekijaqty ózara árekettestik pen ekonomıkalyq yntymaqtastyqtyń jandaný belgileri baıqalyp jatyr.
EO elshisi Ossovskı Eýroodaq on jyldan astam ýaqyt boıy Túrkııaǵa vızasyz rejımdi talqylaýdy usynyp kele jatqanyn aıtyp, vızalyq rejımdi jeńildetý protsesine qaıta oralý qajettigin atap ótti.
— Vızasyz rejım Túrkııadan basqa EO-ǵa kandıdat elderdiń barlyǵymen bar. Bul máseleni talqylaýdy shuǵyl qaıta bastaý qajet, — dedi ol.
Eýrokomıssııa jazdan keıin resmı kelissózderdi qaıta jandandyrýǵa daıyn ekenin jáne vızalyq rejımdi jeńildetý jónindegi jol kartasynda kórsetilgen qalǵan alty krıterıı boıynsha Ankaramen tyǵyz jumys isteýge ázir ekenin málimdedi.
— Biz daıynbyz, Eýropalyq komıssııa Túrkııa bıligimen tyǵyz yntymaqtastyqqa daıyn, — dedi elshi.
Buǵan deıin Túrkııanyń Aqparat jáne kommýnıkatsııa tehnologııalary basqarmasy segiz halyqaralyq eSIM qyzmetine qoljetimdilikti buǵattaǵanyn jazǵan edik.