Eýroodaq turǵyndardy daǵdarys kezinde 72 saǵat boıy óz betinshe kún kórýge daıyndap jatyr
ASTANA. KAZINFORM — Eýropalyq komıssııa halyqty tótenshe jaǵdaılarǵa daıyndaý jónindegi nusqaýlyq jarııalady. Qujatta daǵdarys bastalǵan alǵashqy úsh táýlikte azamattardyń óz qajettilikterin óz betinshe óteýine múmkindik beretin negizgi zattar men quraldardy aldyn ala daıyndaý usynylǵan. Bul týraly Kazinform Anadolu agenttigine silteme jasap habarlady.
Jańa nusqaýlyqty Eýropalyq komıssııanyń teńdik, daǵdarysqa daıyndyq jáne daǵdarysty basqarý máselelerine jaýapty múshesi Hadja Lahbıb Brıýsselde ótken Azamattyq qorǵanys jónindegi toǵyzynshy Eýropalyq forýmda tanystyrdy.
Eýropalyq komıssııanyń málimetinshe, keıingi ýaqytta Eýropada kúrdeli daǵdarystar jıilegen. Osyǵan baılanysty turǵyndardyń yqtımal tótenshe jaǵdaılarǵa daıyndyǵyn arttyrý qajet.
Usynymdarǵa sáıkes, azamattar daǵdarys bastalǵannan keıin memlekettik kómek jetkenge deıingi alǵashqy 72 saǵatta negizgi qajettilikterin óz betinshe óteýge jetetin azyq-túlik pen qajetti zattardyń qoryn aldyn ala ázirleýi kerek.
Budan bólek, Eýropalyq komıssııa mektepke deıingi jáne bastaýysh bilim berý baǵdarlamalaryna tótenshe jaǵdaı kezindegi áreket etý tártibin úıretetin sabaqtardy engizýdi usynady. Sondaı-aq pedagogterge arnalǵan arnaıy is-sharalar ótkizip, daıyndyq sharalaryn ázirleý kezinde múgedektigi bar adamdardyń qajettilikterin eskerý qajet.
Halyqty aqparattandyrýǵa da erekshe nazar aýdarylǵan. Bılik ókilderi tótenshe jaǵdaıǵa deıin, onyń kezinde jáne odan keıin azamattardy senimdi aqparat berýge tıis.
Sonymen qatar 2027 jyldan bastap jyl saıyn 23 qazandy Eýroodaqtyń daǵdarysqa daıyndyq kúni retinde atap ótý usynyldy. Bul bastama halyqtyń habardarlyǵyn arttyryp, Eýropada daǵdarys jaǵdaılaryna daıyndyq mádenıetin qalyptastyrýǵa baǵyttalǵan.
Eske salaıyq, buǵan deıin Eýrokomıssııa EO elderinde baspana máselesi ýshyǵyp turǵanyn moıyndaǵanyn jazǵan edik.
