Eýroodaq Transkaspıı halyqaralyq kólik baǵytyn damytýǵa ınvestıtsııa salýdy josparlap otyr

AQTAÝ. QazAqparat - Búgin Aqtaý qalasynda Transkaspıı ózara baılanysy jóninde ótip jatqan mınıstrlerdiń kezdesýinde QR Indýstrııa jáne ınfraqurylymdyq damý mınıstri Qaıyrbek Óskenbaev múddeli taraptardy Transkaspıı halyqaralyq kólik baǵyty sheńberinde birlesken kásiporyn qurý jónindegi jumysty jandandyrýǵa shaqyrdy, dep habarlaıdy QazAqparat.

Buǵan deıin Vedomstvonyń málimetinshe, Transkaspıı halyqaralyq kólik baǵytyn (THKB) odan ári damytýǵa arnalǵan is-sharaǵa Qazaqstan, Ázirbaıjan, Grýzııa jáne Túrkııanyń syrtqy ister mınıstrleri men kólik máselelerine jaýapty mınıstrlik basshylary qatysýda.

QR IIDM basshysy Qaıyrbek Aıtbaıuly kezdesý barysynda osy jyldyń qyrkúıek aıynda QHR Tóraǵasy Sı Tszınpınniń Qazaqstanǵa resmı sapary aıasynda Qazaqstan Respýblıkasy men Qytaı Halyq Respýblıkasynyń úkimetteri arasynda Qytaı-Eýropa baǵytynda temirjol tasymaldaryn uıymdastyrý salasyndaǵy yntymaqtastyqty tereńdetý boıynsha ózara túsinistik týraly Memorandýmǵa qol qoıylǵanyn eske saldy.

Mınıstr bul baǵytta THKB damýynyń kúshti quraly bola alatyn birlesken kásiporyn qurý boıynsha jumysty jandandyrýdy usyndy. Onyń aıtýynsha, atalǵan kásiporyn ortaq operator retinde júk jóneltýshilermen jáne júk alýshylarmen jumys jasaı otyryp, marshrýttyń barlyq kezeńinde biryńǵaı tarıf pen qyzmetterdiń biryńǵaı standartyn usynatyn bolady.

Sonymen qatar mınıstr Eýropalyq Odaqtyń marshrýtty damytýǵa qarjylaı qoldaý kórsetý nıeti týraly málim etti.

«2021 jyldyń 1 jeltoqsanynda Eýropalyq Komıssııa men EO-nyń Syrtqy ister jáne qaýipsizdik saıasaty jónindegi Joǵarǵy ókili Global Gateway bastamasyn iske qosty. Bul - tsıfrlandyrý, energetıka, kólik, densaýlyq saqtaý, bilim berý jáne zertteý sııaqty salalarda joǵary tehnologııalyq, ekologııalyq jáne qaýipsiz jahandyq baılanystardy damytýdyń jańa eýropalyq strategııasy. Atalǵan strategııany iske asyrý úshin EO THKB damytýǵa ınvestıtsııa salýdy josparlap otyr», – dedi Q.Óskenbaev.