Eýroodaq transatlantıkalyq qatynastar men tarıfter máselesin sheshýge nıetti

ASTANA. KAZINFORM – 17 qańtar kúni keshke Eýrokomıssııa tóraǵasy Ýrsýla fon der Leıen men Eýropalyq keńes tóraǵasy Antonıo Kosta Grenlandııa tóńiregindegi jaǵdaıǵa qatysty birlesken málimdeme jasady, dep habarlaıdy Kazinform tilshisi.

Eýrokomıssııa halyqaralyq quqyqtyń negizgi qaǵıdalary retinde aýmaqtyq tutastyq pen egemendikti atap ótti. Bul qaǵıdalar Eýropa men halyqaralyq qaýymdastyq úshin mańyzdy canalady.

Eýropalyq Odaq lıderleri Arktıkadaǵy beıbitshilik pen qaýipsizdikti, sonyń ishinde NATO aıasyndaǵy ortaq transatlantıkalyq múddeni turaqty túrde qoldaıtynyn málimdedi. Danııanyń odaqtastarymen birlesip ótkizgen aldyn ala kelisilgen áskerı jattyǵýlary Arktıkadaǵy qaýipsizdikti arttyrýǵa baǵyttalǵan jáne eshkimge qaýip tóndirmeıdi.

Eýropalyq Odaq Danııa men Grenlandııa halyqtarymen tolyq yntymaqtastyqta jumys istep jatyr. Dıalog mańyzdy bolyp qala beredi jáne EO Danııa Koroldigi men AQSh arasynda ótken aptada bastalǵan kelissózderdi qoldaýǵa nıetti. Sonymen qatar tarıfter transatlantıkalyq qatynastarǵa keri áserin tıgizip, ekonomıkalyq retsessııa qaýpin arttyrýy múmkin. Eýropa birtutas, úılestirilgen túrde áreket etip, óziniń egemendigin qorǵaýǵa daıyn ekenin atap ótti. 

Eske sala keteıik, buǵan deıin Eýroodaq 2019 jyldan bergi eń joǵary deportatsııa kórsetkishin habarlaǵan bolatyn.