Eýroodaq Tramptyń Gaza boıynsha josparyna qoldaý bildirýge daıyn
ASTANA. KAZINFORM — Eýropalyq komıssııanyń tóraıymy Ýrsýla fon der Lıaıen AQSh prezıdenti Donald Tramp usynǵan Gazadaǵy atysty toqtatý josparyn quptap, Eýropalyq odaqtyń bul bastamaǵa qoldaý kórsetýge daıyn ekenin málimdedi, dep habarlaıdy Anadoly.
Bul týraly ol AQSh-tyń X áleýmettik jelisindegi paraqshasynda jazdy.
Brıýsselde Tramptyń «Gazadaǵy soǵysty toqtatýǵa baǵyttalǵan bastamasyn» oń qabyldaǵanyn atap ótken fon der Lıaıen, barlyq tarapty osy múmkindikti paıdalanýǵa shaqyrdy.
— Qaqtyǵys Gazadaǵy turǵyndarǵa shuǵyl gýmanıtarlyq kómek kórsetý jáne tutqyndardy dereý bosatý arqyly aıaqtalýy tıis. Eki memleket negizinde sheshim qabyldaý — Taıaý Shyǵysta ádiletti ári turaqty beıbit ómirge jetýdiń jalǵyz joly. Bul — ızraıldikter men palestınalyqtar beıbitshilik pen qaýipsizdik jaǵdaıynda, zorlyq-zombylyqsyz ómir súre alatyn bolashaq, — dep jazdy ol.
«Sheshýshi sát»
Eýroparlament tóraıymy Roberta Metsola bul jospardyń Izraılge qaýipsizdik, palestınalyqtarǵa zańdy ózin-ózi basqarý quqyǵy men memlekettilikke umtylý múmkindigin, al búkil aımaqqa — úmit bere alatynyn aıtty.
— Qazir — sheshýshi sát. Biz osy múmkindikti jiberip almaýymyz kerek, — dedi ol.
«Úzdik múmkindik»
EO-nyń syrtqy saıasat jáne qaýipsizdik jónindegi joǵarǵy ókili Kaıa Kallas bul jospardy soǵysty toqtatýdyń eń jaqsy múmkindigi dep atady jáne EO-nyń ony júzege asyrýǵa daıyn ekenin rastady.
— Izraıl bul josparǵa qol qoıdy. HAMAS ony dereý qabyldap, aldymen tutqyndardy bosatýy kerek, — dedi Kallas.
Tramptyń Gaza boıynsha jospary
Buǵan deıin Aq úı «Gazadaǵy qaqtyǵysty toqtatýǵa arnalǵan keshendi jospardy» jarııalady. Jospar 20 tarmaqtan turady.
AQSh prezıdenti Donald Tramp bul qujatty Izraıl premer-mınıstri Bınıamın Netanıahýmen birge ótken baspasóz máslıhatynda tanystyrdy. Tramptyń aıtýynsha, eger taraptar bul jospardy qabyldasa:
-
soǵys birden toqtatylady,
-
Izraıl áskerin Gaza sektorynan kezeń-kezeńimen shyǵarady,
-
HAMAS-syz jańa saıası úderis bastalady,
-
barlyq tutqyn bosatylady.
Netanıahý óz kezeginde bul bastamany qoldap, jospar «soǵys maqsattaryna tolyq sáıkes keledi» dep málimdedi.
Eýroodaq tarapynan alǵashqy reaktsııalardyń biri Eýropalyq keńes tóraǵasy Antonıý Koshtadan kelip tústi. Ol da Tramptyń bastamasyn quptap, taraptardy berilgen múmkindikti tıimdi paıdalanýǵa shaqyrdy.
Aıta keteıik, budan buryn Qazaqstan AQSh Prezıdenti Donald Tramptyń Gaza sektoryndaǵy qaqtyǵysty toqtatýǵa arnalǵan jan-jaqty bitimgerlik josparyn qoldaıtynyn jetkizdi.