Eýroodaq Temu-dy tsıfrlyq qyzmetter týraly zańdy buzdy dep aıyptady
ASTANA. KAZINFORM — Eýropalyq komıssııanyń pikirinshe, qytaılyq Temu ınternet-dúkeninde tutynýshylar «zańsyz ónimderge tap bolý qaýpine» ushyraıdy, dep jazdy DW.
Eýropalyq komıssııa dúısenbi kúni jarııalaǵan baspasóz habarlamasynda Qytaıdyń Temu onlaın-dúkenin EO-nyń Tsıfrlyq qyzmetter týraly zań (DSA — Digital Services Act) talaptaryn buzdy dep aıyptady. Komıssııa ókilderiniń aıtýynsha, bul marketpleıs platformasynda zańsyz ónimderdiń satylýyna jol bermeý úshin jetkilikti sharalar qoldanbaı otyr.
— Dálelder EO aýmaǵyndaǵy tutynýshylardyń bul platformadan zańsyz ónimderge tap bolý qaýpi joǵary ekenin kórsetti, — delingen Eýrokomıssııa málimdemesinde.
DSA zańyna sáıkes, Temu «óte iri onlaın platforma» retinde jikteledi. Bul servısti Eýroodaqta shamamen 94 mıllıon adam paıdalanady. Eger atalǵan aıyptaýlar dáleldense, kompanııa óziniń jahandyq jyldyq tabysynyń 6 paıyzyna deıingi mólsherde aıyppul tóleýi múmkin.
Temu-ǵa qatysty aıyppul rásimi 2024 jyly bastalǵan
2024 jyldyń qazan aıynyń sońynda Eýrokomıssııa Temu kompanııasyna qatysty aıyppul sharalaryn resmı túrde bastaǵanyn habarlady. Sol kezde sheneýnikter marketpleıs saıtyndaǵy betterdiń qalaı rásimdelgenin zerttemek bolǵan. Synshylardyń aıtýynsha, saıt qurylymy tutynýshylarda táýeldilik týdyryp, olardy josparlanbaǵan shyǵyndarǵa ıtermeleıdi.
Ol kezde Temu Eýroodaq bıligimen yntymaqtastyqqa daıyn ekenin málimdep, óziniń maqsaty — «tutynýshylar úshin qaýipsiz ári senimdi naryq qalyptastyrý» ekenin aıtqan.
Tsıfrlyq qyzmetter týraly zań Eýroodaqta 2023 jyldyń tamyz aıynda kúshine endi. Bul zań ınternet-kompanııalardy násilshildikpen, esirtki saýdasymen, kontrafakt ónimdermen, balalar pornografııasymen jáne jalǵan aqparat taratýmen kúresýge mindetteıdi.
Eýropalyq Odaq byltyrǵy jyldyń qarasha aıynda Temu-ge qarsy dabyl qaǵyp, ınternet arqyly zańsyz taýarlardy satýdy toqtata almaıtynyna alańdaýshylyq bildirgen bolatyn. Sol joly komıssııa atalǵan saýda marketpleısinde «buryn buǵattalǵan alaıaq saýdagerler» qaıta qýlyǵyn asyrýy múmkin dep alańdaǵan edi. Sebebi, platformanyń jetkilikti senimdi júıeleri joq ekenin alǵa tartady. Sebebi, keıbir ónimder keıde joıylǵannan keıin birneshe kún ishinde qaıta paıda bolady.