Eýroodaq Taıaý Shyǵystaǵy qaqtyǵysta 130-ǵa jýyq jýrnalıstiń óltirilgenin aıyptady
ASTANA. KAZINFORM – Eýroodaq 2023 jyldyń qazan aıynan beri Taıaý Shyǵystaǵy qaqtyǵysta 130-ǵa jýyq jýrnalıstiń óltirilgenin aıyptady. Bul týraly EO dıplomatııasynyń basshysy Djozep Borrell X (burynǵy Twitter) jelisinde jazdy, dep habarlaıdy Kazinform agenttigi reseılik TASS-qa silteme jasap.
«Jýrnalıster Taıaý Shyǵystaǵy qaqtyǵystardan aqparat taratamyz dep óz ómirlerin qurban etip jatyr. Búgin Izraıl qorǵanys kúshteriniń Lıvanǵa jasaǵan soqqysynan úsh adam qaza tapty. Gaza sektorynda sońǵy jylda 130-ǵa jýyq jýrnalıst kóz jumǵan. Biz muny aıyptaımyz», - deıdi ol.
Taıaý Shyǵystaǵy jaǵdaı 2023 jyldyń 7 qazanynda Gaza sektorynan HAMAS áskerleriniń Izraıl aýmaǵyna kirýinen kúrt nasharlap ketti. Olar shekaralyq eldi mekenderdiń turǵyndaryn óltirip, adamdardy kepilge aldy. HAMAS bul shabýyldy Izraıldiń Ierýsalımdegi Ál-Aqsa meshitindegi áreketine jaýap dep atady.
Sodan keıin Izraıl Gaza sektoryn tolyq blokadaǵa alǵanyn jarııalap, Palestına anklavyn, Lıvan men Sırııanyń bir bóligine soqqy jasaı bastady.
Osyǵan deıin AQSh Memlekettik hatshysy Entonı Blınkenniń Izraıldiń Gazadan kepilge alynǵandardy úılerine qaıtarý jáne soǵys áreketterin toqtatýǵa umtylýy kerektigin aıtqanyn jazǵan edik.
