Eýroodaq Taıaý Shyǵystaǵy deeskalatsııa kúshterin qoldaýǵa daıyn – Sharl Mıshel
ASTANA. KAZINFORM – Eýropalyq keńes basshysy Sharl Mıshel Taıaý Shyǵystaǵy jaǵdaıdyń shıelenisýine baılanysty málimdeme jasady.
«Men Irannyń Izraılge jasaǵan shabýylyn qatań túrde aıyptaımyn – bul aımaqtyq qaýipsizdikke qater tóndiredi. Taıaý Shyǵystaǵy ólimge ákeletin ýshyqqan shıyrshyqty qazir toqtatý kerek. Aımaqtyq soǵys eshkimniń múddesi emes. EO deeskalatsııa jáne beıbit turǵyndardyń ómirin qorǵaý boıynsha kúsh-jigerdi qoldaýǵa daıyn», - dep jazdy Sharl Mıshel X áleýmettik jelisinde.
Buǵan deıin Ulybrıtanııa premer-mınıstri men syrtqy ister mınıstri Irannyń Izraılge zymyrandyq shabýylyn aıyptap, taraptardy budan ári shıelenisten aýlaq bolýǵa shaqyrǵan.
Brıtandyq saıasatkerlerdiń reaktsııasy Irannyń Izraıl aýmaǵyna jasaǵan zymyrandyq shabýyldarynan keıin boldy. Brıtandyq aqparat quraldarynyń habarlaýynsha, Izraıldiń ortalyq jáne ońtústigindegi qalalarǵa keminde 180 zymyran atylǵan.
