Eýroodaq Taıaý Shyǵystaǵy ahýalǵa baılanysty Kıprdegi kezdesýlerin keıinge qaldyrdy
ASTANA. KAZINFORM — Eýropalyq odaqtyń Kıprdegi tóraǵalyǵy naýryz aıynda aralda ótkizilýi josparlanǵan barlyq EO kezdesýlerin keıinge qaldyrý nemese onlaın formatqa aýystyrý týraly sheshim qabyldady, dep habarlaıdy Kazinform agenttiginiń Brıýsseldegi menshikti tilshisi.
Bul sheshim Taıaý Shyǵysta jalǵasyp jatqan daǵdarys aıasynda qabyldandy. Osy jyldyń birinshi jartysynda Kıpr Eýropalyq keńeske tóraǵalyq etedi. Bul týraly eki kıprlik sheneýnikke silteme jasap, eýropalyq POLITICO basylymy habarlady.
Olardyń aıtýynsha, bul sharalar is-sharalarǵa qatysýshylardyń qaýipsizdigin qamtamasyz etý maqsatynda qabyldanǵan. Kıprde tikeleı formatta ótýi tıis bolǵan kezdesýler ne keıinge shegeriledi, ne onlaın formatta ótkiziledi.
Aıta keteıik, Jerorta teńiziniń shyǵys bóliginde ornalasqan Kıpr Taıaý Shyǵys aımaǵyna jaqyn ornalasqan. Qazirgi ýaqytta bul óńirde jaǵdaı shıelenisti kúıinde qalyp otyr. Qandaı naqty kezdesýlerdiń keıinge shegerilgeni jáne olardyń jańa merzimderi ázirge naqtylanbaǵan.
Buǵan deıin Eýroodaq jáne Parsy shyǵanaǵy elderi Irannyń shabýyldaryn aıyptap, shıelenisti azaıtýǵa shaqyrdy.
