Eýroodaq Skype men Viber paıdalanýshylaryna tyńshylyq quqyǵyna qol jetkizgisi keledi
ASTANA. QazAqparat - Eýropalyq odaqtyń sot organdarymen jumys jasaıtyn agenttigi (Eurojust) Skype jáne Vibe, sııaqty servısterdiń málimetterin qolǵa túsirýdiń zańdy tásilderin jasaý qajettigin málimdedi, dep habarlady RT.
Agenttik ókilderiniń aıtýynsha, bul Eýropaǵa Taıaý Shyǵys elderinen oralǵan radıkaldyq kóńil-kúıdegi azamattardyń qyzmetin baqylaý úshin qajet.
Eýroıýst ınternet arqyly málimet berýdiń zamanaýı tehnologııalaryn qoldaný lańkestik jónindegi isterdi tekserýge tehnıkalyq jaǵynan da, zańdyq kózqaras jaǵynan da kedergi keltiretini týraly baıandama shyǵardy.
Sarapshylar qaýip-qaterlerdiń kúsheıe túsýi nátıjesinde Eýropalyq komıssııa Eýropaǵa jáne odan tys jerlerge ushatyn jolaýshylardyń 42 birlik jeke málimetterin usyný talabyn jarııalady. Atap aıtqanda, avıakompanııalar klıentterinen qandaı taǵam jeıtini jáne bir baǵytqa qaraı satyp alynǵan bıletter sany týraly aqparattarmen bólisý talap etilýde.
Degenmen, basqa da kózqarastar bar. Budan buryn Eýropa Keńesi janyndaǵy adam quqyqtary jónindegi ýákil Nıl Mýıjnıeks arnaıy qyzmetterdiń azamattarǵa baqylaý jasaý ádisterine baılanysty olardyń jumysynyń móldirligin arttyrý qajettigi týraly málimdedi. Onyń pikirinshe, lańkestikpen nemese basqa da ulttyq qaýipsizdikke qaýiptermen eshqandaı kúres adamdarǵa jappaı baqylaý ornatýdy aqtaı almaıdy. «Mundaı sharalar óte qajet bolǵan jaǵdaıda ǵana jáne alǵa qoıylǵan maqsattarǵa sáıkes qoldanylýy tıis», - dep jazdy ol «Internettegi zańnyń ústemdigi» degen baıandamasynda.
