Eýroodaq Sırııanyń jańa rejımimen baılanys ornatýǵa tyrysyp jatyr
ASTANA. KAZINFORM — 16 jeltoqsan kúni Brıýsselde alǵash ret EO-nyń jańa Joǵarǵy ókili, eston dıplomaty Kaıa Kallastyń tóraǵalyǵymen EO Syrtqy ister keńesiniń otyrysy ótti, dep habarlaıdy Kazinform menshikti tilshisi.
EO-ǵa múshe 27 eldiń basshylary Sırııa, Lıvan, Ýkraına jáne Grýzııadaǵy jaǵdaıdy qarastyrdy. Eýropalyq dıplomattar Belarýstegi oqıǵalar jóninde de pikir almasty. Kezdesýdiń basty máseleleriniń biri — Sırııadaǵy jaǵdaı. Eýropalyq Odaq oǵan óziniń jetekshi dıplomattarynyń birin jibergen.
Syrtqy ister jáne qaýipsizdik saıasaty jónindegi Joǵarǵy ókil Kaıa Kallas mınıstrlerdi Iordanııa Koroldigi uıymdastyrǵan halyqaralyq kezdesýge qatysýy týraly habardar etti. Onda ol Sırııanyń jańa basshylyǵymen ózara is-qımyldyń negizgi qaǵıdattaryn talqylaý úshin arab elderiniń, sondaı-aq Túrkııa men AQSh-tyń syrtqy ister mınıstrlerimen kezdesti.
K.Kallas sondaı-aq qazirgi ýaqytta Lıvanda júrgen Eýroodaqtyń Sırııadaǵy delegatsııasynyń basshysy (Mıkael Onmaht, GFR) Damaskige eldiń jańa bıligimen baılanys ornatý jáne EO habarlamalaryn jetkizý úshin barǵanyn habarlady.
Keńestiń talqylaýy barysynda EO-nyń Sırııanyń aýmaqtyq tutastyǵy, táýelsizdigi men egemendigi, sondaı-aq esep berýshilik, ınklıýzıvtilik, áıelder quqyqtaryn qurmetteý qaǵıdattary týraly kelisimi atap ótildi.
Mınıstrler ótpeli protses Sırııa basshylyǵy jáne sırııalyqtardyń ózderiniń basshylyǵymen júzege asyrylýy tıis ekenin jáne Sırııa halqynyń barlyq alýan túrliligimen múddelerin kórsetýi kerektigin rastady.
Kaıa Kallas Eýropalyq Odaqtyń Sırııa halqyna gýmanıtarlyq kómektiń eń iri donory bolyp qala beretinin atap ótti. Buǵan EO Asad rejımi qulaǵannan keıin birden qurylǵan áýe kópiri dálel. Ol arqyly densaýlyq saqtaý, bilim berý jáne baspanamen qamtamasyz etýdi qoldaý úshin 100 tonna gýmanıtarlyq kómek jetkizilgen.
EO ótpeli kezeńde Sırııa halqyn qoldaý úshin 2025 jyly toǵyzynshy Brıýssel-Sırııa konferentsııasyn uıymdastyrady.
Keńes odan keıin Taıaý Shyǵys pen Gaza sektoryndaǵy oqıǵalardy keńirek talqylady.
Aıta keteıik, osyǵan deıin Býndestag depýtattarynyń kópshiligi Olaf Sholts úkimetine senimsizdik votýmyn qoldaǵany málim boldy.