Eýroodaq Sırııadaǵy oqıǵalarǵa qatysty resmı málimdeme jasady
ASTANA. KAZINFORM – Jeksenbi kúni Eýroodaqtyń Eýropalyq syrtqy áreket qyzmeti Sırııadaǵy jaǵdaıǵa qatysty qysqasha málimdeme jasady.
- Eýropalyq Odaq Sırııadaǵy tez ózgerip jatqan jáne turaqsyz jaǵdaıdy jiti qadaǵalap otyr. Búkil elde qarýly toptar arasyndaǵy shaıqas kúsheıip jatqandyqtan, biz barlyq taraptardy beıbit turǵyndardy qorǵaýǵa jáne gýmanıtarlyq qyzmetkerlerdiń qaýipsizdigin qamtamasyz etýge shaqyramyz. Biz BUU Qaýipsizdik Keńesiniń 2254 qararyna sáıkes saıası sheshimge shaqyrýymyzdy qaıtalaımyz, - delingen málimdemede.
Buǵan deıin sırııalyq oppozıtsııa Damaskiniń Asad rejıminen azat etilgenin jarııalaǵan bolatyn.
Sırııa prezıdenti Bashar Asad jeksenbi kúni Damaskiden belgisiz baǵytqa ushyp ketti. Sırııadaǵy adam quqyqtaryn baqylaý ortalyǵy onyń senbi kúni keshki saǵat onda qaladan shyqqanyn habarlady.