Eýroodaq Sırııada jańa úkimettiń qurylýyn quptaıdy

ASTANA. KAZINFORM — Eýropalyq Odaq Sırııada jańa ótpeli úkimettiń qurylýyn quptaıdy, dep habarlaıdy Kazinform menshikti tilshisi.

ESSQ málimdemesinde EO Sırııadaǵy jańa úkimetpen «onyń aldynda turǵan úlken qıyndyqtardy jeńýge kómektesý» úshin jumys isteýge daıyn ekeni aıtylǵan.

— Jaqynda Sırııa boıynsha IX Brıýssel konferentsııasynda basa aıtylǵandaı, barlyq sırııalyqtyń armandary júzege asýy kerek. Eýropalyq Odaq Sırııa halqyna qoldaý kórsetedi, sonymen birge jańa úkimet beıbit jáne ınklıýzıvti ótpeli kezeńge qatysty óziniń mindettemesin qamtamasyz etetin bolady, — delingen málimdemede.

Eýropalyq Odaq Sırııa qoǵamynyń barlyq quramdas bólikterin qamtıtyn, jan-jaqty ótpeli ádilettilik barlyq qylmys úshin jaýapkershilikti qamtamasyz etetin jáne ulttyq bitimge eleýli úles qosatyn, Sırııanyń basqarýyndaǵy, Sırııanyń menshigindegi beıbit ótpeli úderisti myzǵymas qoldaıtynyn qaıtalaıdy. Bul turǵyda 25 aqpanda ótkizilgen Ulttyq dıalog konferentsııasynda bastalǵan úderis sheshýshi ról atqaryp otyr. 

Sondaı-aq barlyq syrtqy kúshterdiń Sırııanyń birligi, egemendigi men aýmaqtyq tutastyǵyn tolyq qurmetteýi óte mańyzdy. EO dıplomatııalyq qyzmetiniń málimdemesinde aıtylǵandaı, ol eldegi turaqtylyqqa jáne beıbit jáne ınklıýzıvti saıası aýysý perspektıvalaryna nuqsan keltirýge baǵyttalǵan kez kelgen áreketti aıyptaıdy.

Buǵan deıin Germanııa sırııalyqtarǵa kómek retinde 300 mıllıon eýro bólýdi ýáde etkenin jazǵan bolatynbyz.