Eýroodaq sammıti Brıýsselde ótip jatyr, Erdoǵan qatyspaıdy

ASTANA. KAZINFORM — Búgin Eýropanyń astanasynda eki kúndik Eýroodaq sammıti bastaldy, dep habarlaıdy Kazinform agenttiginiń menshikti tilshisi. 

Talqylaýdyń negizgi taqyryptary retinde EO ekonomıkasynyń básekege qabilettiligi, kelesi kópjyldyq bıýdjet, qorǵanys jáne Ýkraınadaǵy qaqtyǵys qarastyrylady dep josparlanyp otyr.

Osy ýaqytta Túrkııa prezıdenti Rejep Taıyp Erdoǵan 20 naýryzda Brıýsselde ótetin Eýropalyq Odaq sammıtine qatyspaıdy, dep habarlaıdy Hurriyet gazeti.

Basylymnyń málimetinshe, prezıdent mundaı sheshimdi Eýropanyń ustanymy «aıqyn emes» degen sebeppen qabyldaǵan.

Buǵan deıin 19 naýryzda Túrkııa bıligi qazirgi prezıdenttiń basty saıası qarsylasy – Ystambul meri Ekrem Imamoglý ustalǵanyn habarlaǵan edik. Ystambul, Ankara, Izmır jáne Rıze qalalarynda jappaı sherýler men narazylyq aktsııalary ótti. Alaıda Túrkııanyń eń iri megapolısinde jınalystar men mıtıngilerge tyıym salyndy.