Eýroodaq pen Kanada qatynastaryn nyǵaıtady

ASTANA. KAZINFORM — Búgin Brıýssel qalasyna Kanada premer-mınıstri Mark Karnı resmı saparmen keldi, dep habarlaıdy Kazinform menshikti tilshisi.

Kanadanyń jańa premer-mınıstri seısenbi kúni Nıderlandynyń Gaaga qalasynda ótetin NATO sammıtine qatyspas buryn, Eýroodaq pen Kanada qaýipsizdik pen qorǵanys salasyndaǵy iri áriptestik týraly kelisimge qol qoıady dep kútilip otyr.

Ortaq kelisimde Kanada men Eýroodaqtyń ártúrli baǵyttardaǵy yntymaqtastyǵy qarastyrylǵan, sonyń ishinde Ýkraınaǵa qoldaý kórsetý, daǵdarys jaǵdaılaryn basqarý, teńiz qaýipsizdigi, kıberqaýipsizdik, sheteldik aqparattyq manıpýlıatsııaǵa, terrorızmge qarsy kúres, qarý-jaraqty baqylaý, taratpaý jáne qarýlanýdy qysqartý, sondaı-aq ǵarysh baǵdarlamalary bar.

— Bul — biz úshinshi elge usyna alatyn eń keń kólemdi kelisim, — dep málimdedi Eýropalyq komıssııa.

Sonymen qatar eýropalyq BAQ-ta Kanada premer-mınıstriniń Brıýsselge sapary AQSh prezıdenti D. Tramptan buryn jasalyp jatqanyn jazady. Ekinshi prezıdenttik merziminde Donald Tramp áli resmı túrde Brıýsselge barmaǵan.

Buǵan deıin habarlanǵandaı, Kanada Federaldy Úkimeti 21 shildeden bastap AQSh-tan ákelinetin bolat pen alıýmınıı ónimderine qarsy engizilgen tarıfterdi keń aýqymdy saýda kelissózderiniń barysyna sáıkes qaıta qarastyrady.