Eýroodaq Ormýzda ustalǵan brıtan kemelerine qatysty pikir bildirdi
BRıÝSSELЬ. QazAqparat - Eýropalyq Odaq Irandy Parsy shyǵanaǵynda ustalǵan brıtan tankerin dereý bosatýǵa shaqyrdy. Mundaı málimdemeni senbi kúni Eýropalyq Odaqtyń syrtqy saıası qyzmetiniń resmı ókili jasady, dep habarlaıdy QazAqparat tilshisi.
«Iran tarapynyń eki kemeni Ormýz buǵazynda quryqtaýy aıtarlyqtaı alańdaýshylyq týǵyzady», - delingen málimdemede. EO-nyń syrtqy saıası qyzmeti «oqıǵanyń bulaı órbýi onsyz da shıelensiken jaǵdaıdy ýshyqtyryp, qazirgi shıelenisti retteýge baǵyttalǵan jumysqa kedergisin keltirýi múmkin» ekenin eskertti.
«Biz shıelenis jalǵaspaýy úshin kemeni jáne ondaǵy komandany tez arada bosatyp, ustamdy bolýǵa shaqyramyz. Keme qatynasynda erkindik saqtalýy tıis», - delingen qujatta.
Aıta keteıik, Ormýz buǵazynda Iran Islam Respýblıkasy saqshylarynyń korpýsy halyqaralyq teńiz erejelerin buzǵany úshin brıtandyq tankerdiń ustalǵanyn habarlaǵan bolatyn.
