Eýroodaq oqýshylarǵa jasandy ıntellekt saýattylyǵy boıynsha sertıfıkat bermek
ASTANA. KAZINFORM – Eýropalyq odaq 15 jastaǵy oqýshylarǵa jasandy ıntellekt saýattylyǵy boıynsha sertıfıkat berý júıesin ázirleýge kiristi. Bastama balalardy jasandy ıntellekt tehnologııalarynyń qarqyndy damýyna beıimdeýge baǵyttalǵan, dep habarlaıdy Euronews.
Eýrokomıssııa tóraǵasynyń orynbasary Roksana Mıntsatýdyń aıtýynsha, jańa baǵdarlama oqýshylarǵa jasandy ıntellektiniń jumys isteý qaǵıdalaryn túsinýge, aqparattyń shynaıylyǵyn tekserýge jáne manıpýlıatsııalardy ajyratýǵa kómektesedi.
– Bul bastama kishi jastaǵy oqýshylarǵa jasandy ıntellektiniń qalaı jumys isteıtinin túsinýge kómektesedi. Olar jasandy ıntellekt usynǵan aqparatty tekserýdi úırenedi. Sondaı-aq manıpýlıatsııalardy anyqtap, ony qaı kezde paıdalanýdy toqtatý kerektigin biletin bolady, – dedi Roksana Mıntsatý.
Brıýssel jańa sertıfıkattaý júıesin 2027-2028 oqý jylynda iske qosýdy josparlap otyr.
Bastama álemniń kóptegen elinde muǵalimder men oqýshylar jasandy ıntellektini bilim berý úderisinde qoldanýdyń saldarymen betpe-bet kelip otyrǵan kezeńde qolǵa alyndy.
PISA 2025 halyqaralyq zertteýiniń sońǵy derekterine sáıkes, Eýroodaqtaǵy 15 jastaǵy jasóspirimderdiń shamamen úshten biri oqý jáne matematıka boıynsha tómen nátıje kórsetken.
Osyǵan baılanysty Eýrokomıssııa jasandy ıntellekt múmkindikterin paıdalaný arqyly oqytý tıimdiligin arttyrýdy kózdeıdi.
Eýroodaqqa múshe memleketterdiń bilim berý saıasaty Brıýsseldiń tikeleı quzyretine kirmeıdi. Soǵan qaramastan Eýrokomıssııa balalardy oqytýda jasandy ıntellektini qaýipsiz paıdalaný joldaryn zertteýge qoldaý kórsetip keledi.
Eýropalyq sheneýnikterdiń pikirinshe, oqýshylar men muǵalimderdiń jasandy ıntellekt týraly bilimin arttyrý, onyń múmkindikteri men qaýipterin túsindirý bilim sapasyn jaqsartýǵa yqpal etedi.
Sonymen qatar Brıýssel jasóspirimderdiń áleýmettik jelilerge qoljetimdiligin shekteýge baǵyttalǵan zańnamalyq bastamalardy da ilgeriletip jatyr.
Roksana Mıntsatý bul eki bastamanyń bir-birine qaıshy kelmeıtinin atap ótti.
– Jasandy ıntellekt bilim berý úderisiniń jekelegen baǵyttaryn aıtarlyqtaı jaqsarta alady. Atap aıtqanda, ol qosymsha sabaq ótkizý men ár oqýshynyń qajettiligine beıimdelgen oqytý júıesin damytýǵa múmkindik beredi, – dedi ol.
Aıta keteıik, buǵan deıin Eýrokomıssııa 13 jasqa deıingi balalardyń áleýmettik jelilerge qoljetimdiligin shekteýdi usynǵan bolatyn. Bastama balalardy tsıfrlyq platformalardyń yqtımal zııandy áserinen qorǵaýǵa baǵyttalǵan.
