Eýroodaq mysyqtar men ıtterdi mindetti túrde mıkrochıpteýdi engizdi

ASTANA. KAZINFORM — Eýroodaqta ıtter men mysyqtardy mıkrochıp arqyly sáıkestendirý mindetti bolady, dep habarlaıdy BILD.

Eýroparlament janýarlardyń zańsyz saýdasyn shekteý jáne olardy qorǵaýdy kúsheıtý maqsatynda tıisti zań qabyldady.

EO elderi qujatty resmı túrde bekitkennen keıin zań kúshine enip, ótpeli kezeń bastalady. Jeke ıelerdiń ıtterin mindetti chıpteý talaptary jańa erejeler engizilgennen keıin 10 jyldan soń, al mysyqtarǵa qatysty 15 jyldan keıin kúshine enedi. 

Al satýshylar men pıtomnık ıeleri ıtter men mysyqtardy tórt jyldan keıin mindetti túrde chıpteýge tıis bolady. Sol ýaqyttan bastap tek chıptelgen janýarlardy ǵana satýǵa ruqsat etiledi. Aýyldyq jerlerdegi mysyqtar bul talaptan bosatylady.

Erejeler tolyq kúshine engennen keıin barlyq úı janýary ulttyq derekter bazasyna engiziledi.

EO elderi ózara aqparat almasady, bul janýar ıesin tez anyqtaýǵa múmkindik beredi. Mysaly, ıt shetelde demalys kezinde joǵalyp ketse, jergilikti panalar ony ıesine jyldamyraq qaıtara alady.

Sonymen qatar zańsyz janýar saýdasyna tosqaýyl qoıý kózdelip otyr. Endi zańsyz ustalǵan nemese EO aýmaǵyna talaptardy buza otyryp ákelingen janýarlardy qaıta satý qıyndaı túsedi.

Satýshylar men selektsıonerler janýarlardy olardyń qajettilikterine saı kútip-baǵýǵa mindetti bolady. Bul talap endi zańmen bekitildi. Sondaı-aq janýarlarǵa azap shektirý qaýpi joǵary «shekten tys belgileri» bar tuqymdardy ósirýge tyıym salynady. Mysaly, tumsyǵy tym jalpaq ıtter jıi tynys alý problemalarynan zardap shegedi.

Bul uǵymdardyń naqty anyqtamalaryn arnaıy komıssııa sarapshylarmen birlesip 2030 jyldyń shildesine deıin ázirleıdi.

Resmı derekterge sáıkes, Eýroodaqta 72 mıllıonnan astam ıt jáne 83 mıllıon mysyq bar. Bul janýarlar saýdasynyń jyldyq aınalymy shamamen 1,3 mıllıard eýro. 

Aıta ketelik Senat buralqy ıtter máselesine arnalǵan qujatty Májiliske qaıtarǵan edi.