Eýroodaq Lıvııa ókimetiniń atys-shabysty toqtatý týraly ýádesinde turýyn jiti baqylaıtyn bolady

Bul týraly Brıýsselde ótken arnaıy baspasóz máslıhatynda Eýroodaqtyń syrtqy ister jáne qaýipsizdik saıasaty jónindegi joǵarǵy ókili Ketrın Eshton málim etti.

«Biz áriptesterimizben birge osy ýádeniń oryndalýyn baqylaıtyn bolamyz», dedi eýropalyq dıplomatııa jetekshisi.

K.Eshton hanym sondaı-aq, senbi, 19 naýryz kúni Parıjde BUU Bas hatshysy Pan Gı Mýnmen, Arab memleketteri lıgasynyń Bas hatshysy Ámir Mussamen jáne Afrıka odaǵynyń ókili Jan Pınmen kezdesýler ótkizip, Lıvııadaǵy ahýaldy talqylaıtynyn jetkizdi.

Dıplomat sondaı-aq, Eýroodaqtyń Lıvııa ókimetine qatysty ekonomıkalyq sanktsııalardy kúsheıtýge jáne Lıvııanyń beıbit halqyna gýmanıtarlyq kómek jetkizýdi jedeldetýge ázir ekenin málim etti.

Esterińizge sala ketıeik, 17 naýryzda BUU Qaýipsizdik keńesi Lıvııa aspanyn jabýdy jáne M.Kaddafıdiń rejımine qarsy áskerı operatsııa júrgizý múmkindigin qarastyrǵan qarar qabyldaǵan bolatyn. Osyǵan jaýap retinde juma, 18 naýryz kúni Lıvııanyń Syrtqy ister mınıstrligi, el ókimetiniń búlikshilerge qarsy operatsııalardy toqtatý týraly sheshim qabyldaǵanyn málim etti.

Lıvııa armııasy aldaǵy jeksenbiden bastap kóterilisshilerge qarsy operatsııalardy ýaqytsha toqtatyp, «olarǵa qarý-jaraqtaryn tastaýǵa jáne jarııalanyp otyrǵan jappaı raqymshyldyqty paıdalanýǵa» múmkindik bergeli otyrǵanyn QazAqparat buǵan deıin habarlaǵan bolatyn.

«Lıvııanyń Qorǵanys mınıstrligi jeksenbi kúni saǵat 00.00-den bastap (Máskeý ýaqyty boıynsha 01.00) qarýly lańkestik toptarǵa qarsy áskerı operatsııalardy toqtatyp, olarǵa qarý-jaraqtaryn tastaýǵa jáne raqymshyldyqty paıdalanýǵa múmkindik berý týraly sheshim qabyldady», - delingen vedomstvonyń resmı málimdemesinde.