Eýroodaq kóshi-qon saıasatyn qatańdatyp, deportatsııany jedeldetpek

ASTANA. KAZINFORM — Mıgranttar «qaıtarý ortalyqtaryna» jiberiledi, dep habarlaıdy DW agenttigi.

Basylym málim etkendeı, Eýroodaqqa múshe elderdiń ishki ister mınıstrleri kóshi-qon reformalarynyń paketin maquldady. Qujatta EO aýmaǵynan tys jerde «qaıtarý ortalyqtaryn» qurý qarastyrylǵan. Bul ortalyqtarǵa mıgranttar baspana berý týraly ótinishterin qaraý úshin jiberilýi múmkin, tipti olardy Eýropadan birjola shyǵarý sharalary da qoldanylýy yqtımal.

Danııa mundaı tásildi 2021 jyldan bastap Rýandaǵa mıgranttardy jiberý múmkindigin qarastyra bastaǵan. Alaıda bul júıeni is júzinde alǵash bolyp engizgen Eýroodaq eli — Italııa. Ótken jyly Rım kórshiles Albanııada osyndaı ortalyqtar qurǵanymen, keıin olar quqyqtyq qıyndyqtarǵa baılanysty jumysyn ýaqytsha toqtatty.

— Buǵan deıin qaıyrymdylyq uıymdary men quqyq qorǵaýshylar, sonyń ishinde Human Rights Watch pen Oxfam, Brıýsseldi «jaýapkershilikten jaltarý» úshin synǵa alǵan bolatyn. Olar EO-nyń baspana berý jónindegi ótinishterdi qaraý protsesin «aýtsorsıngke berý» áreketterin osylaı ataǵan, — delingen habarlamada.

Sonymen qatar Brıýsselde sarapshylardyń baǵalaýynsha, EO-nyń kóshi-qon saıasatyn qatańdatý baǵytyna qaıshy keletin jospar da ázirlendi. Ol «Yntymaqtastyq qoryn» qurýdy kózdeıdi. Bul tetik Eýroodaq ishindegi kóshi-qon júktemesin qaıta bólýdi maqsat etedi. Josparǵa sáıkes, Soltústik jáne Shyǵys Eýropa elderi baspana izdeýshilerdiń basym bóligi keletin EO-nyń ońtústik memleketterinen mıgranttardy kóbirek qabyldaýy nemese Kıpr, Ispanııa, Italııa men Gretsııany qoldaý úshin ortaq qorǵa qarjy aýdarýy tıis.

Buǵan deıin Eýrokomıssııa reseılikterge Shengen vızasyn berý sharttaryn qatańdatatynyn jazǵan edik.