Eýroodaq koronavırýsqa qarsy úshinshi vaktsınany maquldady

BRıÝSSELЬ. QazAqparat – Búgin Eýropanyń Dári-dármek jónindegi agenttigi (EMA) AstraZeneca farmakologııalyq kompanııasynyń koronavırýsqa qarsy vaktsınasyn qoldanýǵa keńes berdi, dep habarlady QazAqparat.

AstraZeneca – bul endi Eýroodaqta qoldanýǵa ruqsat etilgen úshinshi vaktsına («Pfizer/BioNTech» jáne «Moderna» vaktsınalarynan keıin).

Eýropanyń Dári-dármek jónindegi agenttigi ázirge 55 jastan asqan adamdar toby úshin qorǵanys deńgeıin anyqtaıtyn zertteý qorytyndylary jetkiliksiz ekenin málimdedi. Alaıda, «basqa vaktsınalar týraly bilgenimiz ben synaýdyń aǵymdaǵy qorytyndylaryna negizdelip, osy maqsatty toptan da qorǵanys kútip otyrmyz» - delingen EO ókiletti organynyń málimdemesinde.

«Onyń qaýipsiz ekeni týraly rastalǵan aqparat bar. Bizdiń mamandarymyz vaktsınany qart adamdarǵa da egýge bolady dep sanaıdy. Qosymsha aqparat jasy odan da úlken adamdardyń qatysýymen ótetin aǵymdaǵy zertteýler barysynda keledi», - dep habarlady EMA ókili.

«Úshinshi oń qorytyndyny ala otyryp, biz EO-ǵa múshe memleketter úshin qoljetimdi vaktsınalar arsenalyn odan da kóp keńeıttik», - dedi EMA-nyń atqarýshy dırektory Emer Kýk.

AstraZeneca vaktsınasy adam aǵzasyna 4-ten 12 aptaǵa deıingi ýaqytsha kezeńde eki ınektsııamen engiziledi. Bul medıtsınalyq preparat Ulybrıtanııada qoldanylyp júr.