Eýroodaq Qyrym men Sevastopolge qatysty sanktsııalaryn uzartty

ASTANA. KAZINFORM — Eýroodaq keńesi dúısenbi, maýsymnyń 16-sy kúni Reseıdiń Qyrym túbegi men Sevastopol qalasyn zańsyz anneksııalaýyna jaýap retinde Eýropalyq Odaq 2014 jyly maýsymda salǵan sanktsııalaryn taǵy bir jylǵa uzartty. 

Brıýssel áńgime anneksııalanǵan Qyrymnan Eýropalyq Odaqqa taýarlar men qyzmetterdiń ımportyna tyıym salý, túbektiń ekonomıkasyna ınvestıtsııa salý, sondaı-aq kólik, telekommýnıkatsııa, energetıka, munaı-gaz ónerkásibi úshin taýarlar men tehnologııalardy jetkizý jóninde ekenin eske saldy.

Eýropalyq Odaq Keńesi press-relızinde atap ótkendeı, 2022 jyldan bastap Reseı Federatsııasy Ýkraınanyń egemendigi men aýmaqtyq tutastyǵyn buzyp, bul elge qarsy keń aýqymdy soǵys bastady.

— Eýropalyq Odaq Ýkraınanyń halyqaralyq moıyndalǵan shekaralaryndaǵy táýelsizdigine, egemendigi men aýmaqtyq tutastyǵyna jáne onyń Reseı agressııasynan ózin-ózi qorǵaýǵa degen ajyramas quqyǵyna berik, - delingen mátinde.

Reseı Federatsııasynyń Ýkraınaǵa qarsy áskerı agressııasyna jaýap retinde Brıýssel Máskeýge qarsy 17 sanktsııa paketin engizdi. Olardyń sońǵysy Reseı munaıyn eksporttaý úshin qoldanatyn «kóleńkeli flottyń» taǵy 200 kemelerine shekteýlerdi qamtıdy. Sonymen qatar Eýropalyq Odaqtyń sanktsııa tizimine 75 jańa zańdy jáne jeke tulǵa qosyldy.
Bloomberg agenttiginiń habarlaýynsha, Eýropalyq Odaqtyń kelesi, 18-sanktsııalar paketi reseılik qarjy sektoryna baǵyttalady.

Atap aıtqanda, taǵy 20 reseılik bankti halyqaralyq SWIFT tólem júıesinen ajyratý talqylanýda. Taǵy bir yqtımal qadam reseılik munaı baǵasynyń shegin barreline 60 dollardan 30 dollarǵa deıin tómendetý bolyp tabylady.

Eske sala keteıik, Rosatom sanktsııaǵa tússe, Qazaqstanda salynatyn alǵashqy AES-tiń taǵdyry ne bolatyny jaıly jazǵan edik.