Eýroodaq Qyrǵyzstan áýe kompanııalaryna qoıǵan shekteýin alyp tastady
ASTANA. KAZINFORM - Qyrǵyzstan Eýropalyq Odaqtyń avıatsııalyq qaýipsizdik talaptaryna saı kelmeıtin áýe tasymaldaýshylarynyń «qara tiziminen» resmı túrde shyǵaryldy.
Osylaısha elge qatysty 20 jyl boıy qoldanylǵan shekteý kúshin joıdy, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan prezıdenti ákimshiliginiń málimetinshe, Eýropalyq komıssııanyń Utqyrlyq jáne kólik jónindegi bas dırektsııasy respýblıkaǵa tıisti habarlama joldaǵan.
Qujatta Qyrǵyzstanda sertıfıkattalǵan barlyq áýe kompanııasyna Eýroodaq elderine ushýǵa qoıylǵan tyıym tolyq alynǵany aıtylǵan.
Bul sheshim 2026 jylǵy 19-21 mamyr aralyǵynda ótken EO-nyń Ushý qaýipsizdigi komıtetiniń (ASC) otyrysynyń qorytyndysy boıynsha qabyldandy. Ol aldaǵy ýaqytta Eýropalyq komıssııanyń arnaıy reglamentimen rásimdeledi.
Qyrǵyzstan 2006 jyldan beri atalǵan tizimde bolǵan.
Prezıdent ákimshiliginiń habarlaýynsha, sońǵy jyldary elde azamattyq avıatsııa salasyn jańǵyrtýǵa baǵyttalǵan keshendi jumystar júrgizildi.
– Sońǵy jyldary elde azamattyq avıatsııany reformalaý, ushý qaýipsizdigin memlekettik baqylaýdy kúsheıtý jáne ulttyq júıeni ICAO halyqaralyq standarttaryna sáıkestendirý baǵytynda júıeli jumys atqaryldy, – delingen habarlamada.
Qyrǵyzstanda sheteldik nómirli kólikterdi zańdastyrýǵa sońǵy múmkindik berilgeni týraly jazdyq.
