Eýroodaq keńesiniń prezıdenti RF Prezıdenti D.Medvedevke kóńil aıtý jedelhatyn joldady
BRıÝSSELЬ. 25 qańtar. QazAqparat /Dımash Syzdyqov/ - Eýroodaq Keńesiniń (Eýroodaqtyń joǵarǵy organy) Prezıdenti Herman Van Rompeı Máskeýdegi «Domodedovo» áýejaıynda bolǵan lańkestik oqıǵaǵa baılanysty Reseı Prezıdenti Dmıtrıı Medvedevke kóńil aıtyp, jedelhat joldady, dep habarlady Eýroodaq Keńesiniń baspasóz qyzmetinen.
«Adam qurbandyqtary oryn alǵan «Domodedovo» áýejaıyndaǵy lańkestik áreketti men úzildi-kesildi aıyptaımyn. Bul qylmys meni qatty ashýlandyryp otyr, osynaý árekettiń syrtynda turǵandardy taýyp, olardy jazalaýǵa úndeımin. Qaza bolǵandardyń otbasylaryna kóńil aıtamyn», - delingen Eýroodaq basshysynyń habarlamasynda.
Eýroodaqtyń Syrtqy ister jáne qaýipsizdik saıasaty jónindegi joǵary ókili Ketrın Eshton hanym da Máskeýdegi lańkestik áreketti aıyptap, qaza bolǵandardyń otbasylary men jaqyndaryna kóńil aıtty. «Osynaý jantúrshigerlik shabýyl kezinde beıkúná adamdar qaza boldy. Eýroodaq lańkestik áreketterdiń barlyǵyn aıyptaıdy jáne reseılikterge kóńil aıtady», - delingen eýropalyq sheneýniktiń málimdemesinde.
Esterińizge sala keteıik, 24 qańtar kúni tústen keıin Máskeýdegi «Domodedovo» áýejaıynda lańkestik áreket oryn alyp, oqıǵa saldarynan ondaǵan adam qaza tapty, júzdegen adam jaralandy.
