Eýroodaq Qazaqstannan balyq ónimderin satyp alatyn boldy

ASTANA. QazAqparat – Eýroodaq Qazaqstan kompanııalarynyń balyq ónimderin satyp alýǵa daıyn. Bul týraly Aýyl sharýashylyǵy mınıstri Erbol Qarashókeev jelidegi paraqshasynda jazdy, dep habarlaıdy QazAqparat.

«Otandyq balyq ónimderi endi Eýropa tutynýshylarynyń ústelinen jıi tabylatyn bolady. Eki apta buryn Brıýsselge jasaǵan saparym kezinde ondaǵy Eýrokomıssarlarmen iskerlik kezdesýler týraly aıtqan edim. Biz Eýropalyq Odaq elderine qazaqstandyq balyq ónimderin jetkizý týraly kelissózder júrgizgen edik. Nátıje bar. Búgin Eýropalyq komıssııa qazaqstandyq veterınarııalyq baqylaý júıesine degen senimin qalpyna keltirý týraly nıetin jetkizdi. Bul degenimiz erteń, 15 naýryzdan bastap qazaqstandyq kompanııalardy Eýroodaqqa eksporttaýǵa quqyǵy bar kásiporyndar tizimine engizý rásimin qaıta bastaıdy. Bul tizimde 17 otandyq mekeme bar», - dep jazdy mınıstr.

Sonymen qatar Erbol Qarashókeev atalǵan protsestiń qysqasha tarıhyn da aıtyp berdi.

«Osydan 5 jyl buryn Eýrokomıssııa qazaqstandyq balyq zaýyttaryna aýdıt júrgizgen bolatyn. Onyń qorytyndysy boıynsha 11 usynys pen eskertýler berildi, onyń ishinde Qazaqstannyń veterınarııalyq qyzmeti úshin de aıtar keńesteri bolǵan. Keıingi jyldary biz osy usynystary boıynsha nátıjeli jumys istep, EO-ǵa egjeı-tegjeıli esepti jiberdik. Búgin mine, rastaý keldi: Eýroodaq Qazaqstan kompanııalarynyń balyq ónimderin satyp alýǵa daıyn! Endigi kezekte bal ónimderi tur. Eýropalyq komıssııa bal týraly saýalnama jiberdi. Eger barlyq talaptar men standarttar sáıkes kelse, onda otandyq omartashylar úshin de Eýropa naryǵy ashylady degen sóz», - dep tolyqtyrdy AShM.