Eýroodaq Qazaqstanmen jan-jaqty yntymaqtastyqty odan ári tereńdetýge daıyn - Antonıý Koshta
ASTANA. KAZINFORM - Elimizde resmı saparmen júrgen Eýropalyq Keńes Prezıdenti Antonıý Koshta Memleket basshysymen kelissóz barysynda qonaqjaılyq tanytqany úshin Qasym-Jomart Toqaevqa rızashylyǵyn bildirdi, dep habarlaıdy Aqordanyń baspasóz qyzmeti.
Sonymen qatar mártebeli meıman Qazaqstan men Eýropa arasyndaǵy yqpaldastyqtyń qarqyndy damyp kele jatqanyn atap ótip, Eýroodaqtyń elimizben jan-jaqty yntymaqtastyqty odan ári tereńdetýge daıyn ekenin rastady.
– Sońǵy 10 jylda Eýropa Odaǵy Qazaqstannyń eń iri saýda seriktesine jáne sheteldik ınvestoryna aınaldy. Óz kezeginde Qazaqstan Eýropaǵa munaı men ýran jetkizýshi elderdiń úshtigine kiretin el retinde ekonomıkalyq qaýipsizdigimizdi qamtamasyz etýde negizgi ról atqarady. Búgin biz qarym-qatynasymyzdy nyǵaıtýdyń jáne ekonomıkalyq baılanystardy damytýdyń jańa kezeńine qadam basamyz, – dedi Eýropalyq Keńes Prezıdenti.
Mártebeli meımannyń aıtýynsha, Eýropa Odaǵy men Qazaqstan BUU Jarǵysynda bekitilgen mýltılateralızm men halyqaralyq tártip qundylyqtaryna arqa súıeıtin beıbitshilik ustanymyn jaqtaıdy.
Eýropalyq Keńes basshysy álemdegi qaýipsizdikti, turaqtylyq pen órleýdi qamtamasyz etetin kúsh-jiger dál osy qaǵıdatta kórinis tapqanyn jetkizdi.
Antonıý Koshta Ortalyq Azııa elderimen yntymaqtastyq qazirgi kópjaqty álemdegi qarym-qatynasty ilgeriletýdiń mańyzdy faktoryna aınalǵanyn atap ótti. Bul rette ol Prezıdent Qasym-Jomart Toqaevtyń Kavkaz aımaǵyndaǵy beıbitshilikti nyǵaıtýǵa qosqan úlesin joǵary baǵalady.
Onyń pikirinshe, óńirdegi qaýipsizdikti qamtamasyz etý Kavkaz jáne Qara teńiz arqyly Eýropaǵa shyǵatyn Transkaspıı kólik dálizin damytýǵa tyń múmkindik beredi.
Kezdesýde ekijaqty qarym-qatynastyń aýqymdy máseleleri qarastyrylyp, kólik-logıstıka, tsıfrlandyrý, energetıka, mańyzdy mıneraldar, aýyl sharýashylyǵy sekildi perspektıvti baǵyttarǵa basa mán berildi.
Osyǵan deıin Memleket basshysynyń Eýropalyq Keńes Prezıdenti Antonıý Koshtamen kelissóz júrgizgeni týraly jazdyq.