Eýroodaq Qazaqstandy Shengen boıynsha «qara tizimge» engizgen joq

ASTANA. QazAqparat - Qazaqstan azamattary úshin Shengen vızasyn resimdeý tártibinde 2023 jylǵy 1 naýryzdan keıin aıtarlyqtaı ózgerister bolǵan joq. Sondaı-aq, Eýropalyq Odaq elimizdi «qara tizimge» engizgen joq. Bul týraly Qazaqstandaǵy EO ókildiginiń resmı saıtynda aıtylǵan, dep habarlaıdy QazAqparat.

«Erejege sáıkes Shengen vızasyn berý týraly sheshimdi EO-ǵa múshe memlekettiń tıisti konsýldyǵy 15 kún ishinde qabyldaıdy. Atalǵan ereje Qazaqstan úshin burynǵy túrinde qalady.

Erekshe jáne jekelegen jaǵdaılarda, ıaǵnı ótinishti egjeı-tegjeıli qaraý nemese qosymsha qujattardy usyný qajet bolsa, merzim 45 kúnge deıin uzartylýy múmkin. Bul tártip ótinish berýshilerdiń azamattyǵyna qaramastan sol sııaqty tek erekshe jaǵdaılarda ǵana qoldanylady.

Qazaqstan úshin jýyrda ǵana engizilgen aldyn ala konsýltatsııalar ótkizý rásimi jeti kúnge deıin sozylýy múmkin. Konsýltatsııalar standartty rásim boıynsha 15 kúnge deıin júrgiziledi. Sondyqtan ótinish berýshiler úshin vıza berýde aıtarlyqtaı kidiris bolmaıdy.

Aldyn ala konsýltatsııa júrgizý vızalyq kodekspen retteletin standartty rásim. Ol birqatar elderge qoldanylady. Shengen aımaǵyna múshe memleketter bir-birimen keńesý úshin júıeli túrde qoldanatyn Shengen aqparattyq júıesinde (ShIS) «qara tizim» degen uǵym joq. Shengen aqparattyq júıesi aıasynda Qazaqstan úshin aldyn ala konsýltatsııalardy engizý EO men Qazaqstan arasyndaǵy ekijaqty ártúrli baǵyttar jáne salalar boıynsha serpindi damýdy jalǵastyratyn qarym-qatynasqa esh qatysy joq», - delingen habarlamada.

Vıza alýǵa ótinish berý tártibi týraly jalpy aqparatty kóshi-qon jáne ishki ister jónindegi bas dırektorattyń veb-saıtynan tabýǵa bolady.

Eske salsaq, osydan birer kún buryn Syrtqy ister mınıstrligi Shengen vızasyna qatysty túsinik bergen edi.

«Qazaqstannyń qandaı da bir tizimge engizilgeni týraly máselege keletin bolsaq, biz Eýropa jaǵynan resmı habarlama alǵan joqpyz. Alaıda, jumys tártibinde talqylaý kezinde bizge tıisti málimet kelip tústi, ıaǵnı 1 naýryzdan bastap Qazaqstan Shengen vızasyn berý kezinde budan bylaı azamattarǵa qosymsha konsýltatsııalar talap etiletin elderdiń tizbesinde bolady. Bul turǵyda ádettegi jumys protsesi eskerilgen. Bizdiń oıymyzsha, mundaı qadam Shengen kelisimine múshe bir eldiń suranysy boıynsha iske asyrylyp otyr. Óıtkeni, Eýropa Odaǵynyń erejelerine sáıkes, EO men Shengen aımaǵynyń elderi vıza alýǵa ótinish bergen úshinshi elderdiń azamattaryna qatysty qosymsha konsýltatsııalar bastaýǵa quqyǵy bar», - degen edi atalǵan vedomstvonyń resmı ókili Aıbek Smadııarov aptalyq brıfıng barysynda.