Eýroodaq Izraıldiń Batys jaǵalaýdaǵy áreketin aıyptady
ASTANA. KAZINFORM – Eýropanyń syrtqy áreketter qyzmeti Izraıl qarjy mınıstri Betsalel Smotrıchtiń Palestına aýmaǵyndaǵy basyp alynǵan jerlerdiń 800 gektaryn «memlekettiń jeri» dep málimdeýin aıyptady, dep habarlaıdy Kazinform agenttiginiń menshikti tilshisi.
Bul - Oslo Kelisiminen keıingi eń iri tárkileý, dep málimdedi Eýropanyń syrtqy áreketter qyzmetiniń ókilderi.
Eýropanyń syrtqy áreketter qyzmetiniń resmı ókili Peter Stano Batys jaǵalaýdaǵy ızraıldikter qonystanǵan jerler halyqaralyq gýmanıtarlyq quqyqty óreskel buzý bolyp tabylatynyn aıtty.
Osy aptada Eýropalyq keńestiń májilisinde EO lıderleri Izraıl bıliginiń Batys jaǵalaýda basyp alynǵan jerlerde zańsyz qonystardy odan ári keńeıtý týraly sheshimin aıyptady. Olar Izraıldi bul sheshimnen bas tartýǵa shaqyrdy.
«Eýroodaq BUU Qaýipsizdik Keńesiniń jalpy kózqarasy jáne qararlaryna sáıkes, 1961 jyldan bergi shekaranyń ekijaqty kelisimsiz ózgerýin moıyndamaıdy. Bul Eýroodaqtyń Izraıldiń qaýipsizdigi jáne 7-shi qazan kúni Izraıl azamattaryna jasalǵan shabýyl endi qaıtip qaıtalanbasa eken, degen kózqarasymen ushtasyp jatyr. Eýrodaq mundaı terrorızmmen sózben emes ispen kúresýge bel baılaǵan. Sol úshin de uıym HAMAS-tyń áreketin aıptaıdy jáne sanktsııa salý sııaqty ózge de sharalardy senimdi túrde júzege asyrady. Al Batys jaǵalaýdaǵy qonystardy keńeıtý osy maqsatqa kereǵar sheshim bolyp otyr. Sondaı-aq ol Izrıal men Palestına turǵyndarynyń uzaqmerzimdi qaýipsizdiginiń kepili bolyp tabylatyn eki eldiń tatý-tátti ómirin retteý perspektıvasyna keri yqpal etip, ózara shıelenisti ýshyqtyra túsedi»,-dedi Brıýsselde.
