Eýroodaq Izraıl-Iran qaqtyǵysyna qatysty málimdeme jasady
ASTANA. KAZINFORM - Eýropalyq syrtqy is-qımyl qyzmeti Taıaý Shyǵystaǵy jaǵdaı týraly málimdeme jasady, dep habarlaıdy Kazinform agenttiginiń menshikti tilshisi.
– Eýropalyq Odaq Taıaý Shyǵystaǵy jaǵdaıdy muqııat qadaǵalap otyr jáne Izraıldiń Iranǵa jasaǵan soqqylary men Irannyń jaýap qaıtarý áreketterinen keıin Taıaý Shyǵysty turaqsyzdandyrý qaýpin týdyratyn qaýipti shıeleniske qatysty alańdaýshylyq bildiredi.
EO aımaqtyq qaýipsizdikke, sonyń ishinde Izraıldiń qaýipsizdigine degen berik ustanymyn qaıtalaıdy jáne barlyq taraptardy halyqaralyq quqyqty qurmetteýge, ustamdylyq tanytýǵa jáne radıoaktıvti zattardyń yqtımal shyǵarylýy sııaqty aýyr zardaptarǵa ákep soqtyratyn ári qaraı qadamdardan bas tartýǵa shaqyrady.
EO árqashan Irannyń ıadrolyq qarýǵa qol jetkizýine ruqsat berilmeýi kerek ekenin jáne MAGATE Basqarýshylar keńesi Irannyń ıAQTSh boıynsha óziniń zańdy túrde mindetti ıadrolyq kepildikter mindettemelerin oryndamaıtynyn anyqtaǵan MAGATE-niń sońǵy esebine alańdaýshylyq bildirdi. Biraq turaqty qaýipsizdik áskerı áreketpen emes, dıplomatııa arqyly qurylady.
Biz dıplomatııa basym bolýy kerek dep sanaımyz. EO shıelenisti azaıtý jáne Irannyń ıadrolyq problemasynyń uzaq merzimdi sheshimin tabý úshin barlyq dıplomatııalyq kúsh-jigerge úles qosýdy jalǵastyrady, buǵan tek kelissózder arqyly qol jetkizýge bolady, - delingen EEAS málimdemesinde.
Eske sala keteıik, juma, 13 maýsymǵa qaraǵan túni Izraıl Iranǵa jappaı soqqy berdi. Buǵan jaýap retinde Tegeran Izraılge qaraı júzden astam dron ushyrdy. Iran Natanzedegi ıadrolyq qondyrǵynyń zaqymdanǵanyn rastady, biraq radıatsııanyń aǵyp ketkenin joqqa shyǵardy.
Iran Izraılge zymyran soqqylarynyń jańa tolqynyn bastady. Izraıldiń Tótenshe jaǵdaılar qyzmeti habarlaǵandaı, ırandyq zymyran atysynan eki adam qaza tapty – shamamen 60 jastaǵy áıel jáne 45 jastaǵy er adam. Taǵy 19 adam jaraqat aldy, dep habarlady Izraıldiń jedel járdem qyzmeti.
Irannyń BUU-daǵy ókili Izraıldiń áýe shabýyly saldarynan 78 adamnyń qaza tapqanyn aıtqan bolatyn. Iranda 320-dan astam adam jaraqat aldy.
Buǵan deıin Iran joǵary shendi áskerı qolbasshylar men jetekshi ǵalymdardyń Izraıl soqqysy saldarynan qaza tapqanyn rastady.
Iran Izraıl shabýylynan keıin Ormýz buǵazyn jabaıyn dep jatyr.
Iran-AQSh kelissózderine deldal bolyp júrgen Oman Syrtqy ister mınıstri Badr ál-Býsaıdı jeksenbi kúni Maskatta ótýi josparlanǵan kelissóz ótpeıtinin rastady.
Izraıl Iranǵa taǵy soqqy jasap jatyr.