Eýroodaq Iran men Izraıldi kelissóz ústeline otyrýǵa úndedi
ASTANA.KAZINFORM — Eýropalyq dıplomatııa basshysy Kaıa Kallas Iran men Izraıl arasyndaǵy ózara soqqylarǵa qatysty pikir bildirdi. Bul týraly Anadoly agenttigi málim etti.
Taıaý Shyǵys óńirine dıplomatııalyq kelissózder qajet, sondaı-aq shıelenisti báseńdetý mańyzdy. Bul týraly Eýropalyq Odaqtyń syrtqy ister jáne qaýipsizdik saıasaty jónindegi Joǵarǵy ókili Kaıa Kallas Iran men Izraıl arasyndaǵy sońǵy soqqy almasý jaǵdaıyna baılanysty málimdedi.
— Meniń oıymsha, óńirge eskalatsııa emes, kerisinshe taraptardyń kelissóz ústeline otyryp, ortaq mámilege kelýi qajet, — dedi Kallas.
Eýrodıplomatııa basshysy Iran men AQSh arasynda Ormýz buǵazy máselesi boıynsha kelisimge qol jetkizýdiń mańyzdylyǵyn atap ótti.
Sondaı-aq ol Eýropalyq Odaq atysty toqtatý kelisimi ornaǵannan keıin teńiz tasymalyn súıemeldeýge úles qosýǵa daıyn ekenin jetkizdi.
— Biz eki tarappen de baılanystamyz jáne atysty toqtatýdyń asa mańyzdy ekenin jetkizýge tyrysyp jatyrmyz, — dep túıindedi ol.
Eske sala keteıik, buǵan deıin Eýropalyq odaqtyń syrtqy ister jáne qaýipsizdik saıasaty jónindegi joǵary ókili Kaıa Kallas Pákistanǵa resmı saparmen barǵanyn jazdyq.
